ജിദ്ദ:സഊദിയിലെ കിഴക്കന്‍ പ്രവിശ്യയായ ദമ്മാമിലെ ഖത്തീഫില്‍ അജ്ഞാതരുടെ വെടിയേറ്റ് ഒരു പൊലിസുകാരന്‍ കൊല്ലപ്പെട്ടതായി ആഭ്യന്തരമന്ത്രാലയം അറിയിച്ചു. ചൊവ്വാഴ്ച വൈകീട്ട് നാലുമണിയോടെ താറൂത്തിലാണ് സംഭവം. കാറില്‍ യാത്ര ചെയ്യുന്നതിനിടെയാണ് വെടിയേറ്റത്. ഒളിച്ചിരുന്ന മൂന്നു ആയുധധാരികള്‍ വെടിയുതിര്‍ക്കുകയായിരുന്നുവെന്ന് കിഴക്കന്‍ മേഖല പൊലിസ് വക്താവ് കേണല്‍ സെയ്ദ് അല്‍ റിഖൈതി പറഞ്ഞു.

മാരകമായി പരുക്കേറ്റ ഇദ്ദേഹത്തെ ഉടനടി ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. സ്ഥലത്ത് നിന്ന് രക്ഷപ്പെട്ട അക്രമികള്‍ക്കായി മേഖലയിലാകെ തിരച്ചില്‍ തുടരുകയാണ്. പ്രദേശം പൊലിസ് സീല്‍ ചെയ്തിരിക്കുകയാണ്. വിവിധ കേന്ദ്രങ്ങളില്‍ സുരക്ഷാസേന റെയ്ഡുകള്‍ നടത്തുന്നുണ്ട്. സംഭവത്തെ കുറിച്ച് ക്രിമിനല്‍ ഇന്‍വെസ്റ്റിഗേഷന്‍ വിഭാഗം അന്വേഷണം ആരംഭിച്ചിതായി സഊദി ആഭ്യന്തര മന്ത്രാലയം വക്താവ് പറഞ്ഞു. കഴിഞ്ഞ ഏതാനും മാസങ്ങള്‍ക്കിടെ സുരക്ഷ ഉദ്യോഗസ്ഥര്‍ക്കു നേരെയുള്ള നാലാമത്തെ ആക്രമണമാണിത്. സംഭവത്തെ കുറിച്ച് അന്വേഷിച്ച് വരികയാണെന്ന് ആഭ്യന്തര മന്ത്രാലയം അറിയിച്ചു.