അബൂദബി: ശൈഖ് സായിദിന്റെ ഓര്‍മകള്‍ തുടിക്കുന്ന കാരുണ്യത്തിന്റെയും ക്ഷേമ, വികസന പ്രവര്‍ത്തനങ്ങളുടെയും വര്‍ഷമായി ആചരിക്കുന്ന സായിദ് വര്‍ഷത്തില്‍ അബൂദബി ഇന്ത്യന്‍ ഇസ്‌ലാമിക് സെന്ററും ഗള്‍ഫ് സത്യധാരയും സംയുക്തമായി ഇന്റര്‍ നാഷനല്‍ കോണ്‍ഫറന്‍സ് സംഘടിപ്പിക്കുന്നു.
മെയ് 11ന് അബൂദബി ഇന്ത്യന്‍ ഇസ്‌ലാമിക് സെന്ററില്‍ നടക്കുന്ന ചടങ്ങ് യു.എ.ഇ സഹിഷ്ണുത മന്ത്രി ശൈഖ് നഹ്യാന്‍ ബിന്‍ മുബാറക്കിന്റെ രക്ഷാകര്‍തൃത്തിലാണ് നടക്കുന്നത്. എം.കെ ഗ്രൂപ്പ് മേധാവി എം.എ യൂസഫലി, കേരള നിയമസഭ സ്പീക്കര്‍ പി. രാമകൃഷ്ണന്‍, ഇ.ടി മുഹമ്മദ് ബഷീര്‍ എം.പി, ഇന്ത്യന്‍ അംബാസിഡര്‍ നവദീപ് സിങ് സൂരി, ബഹാവുദ്ദീന്‍ മുഹമ്മദ് നദ്‌വി, പാണക്കാട് സയ്യിദ് സാദിഖലി ശിഹാബ് തങ്ങള്‍ ഉള്‍പ്പെടെ രാഷ്ട്രീയ സാമൂഹ്യ, മത, സാംസ്‌കാരിക, വ്യാവസായ രംഗത്തെ പ്രഗത്ഭരും അറബ് മേഖലയിലെ പ്രമുഖരും സംബന്ധിക്കും. മുന്‍ എം.പി അബ്ദുസ്സമദ് സമദാനി മുഖ്യപ്രഭാഷണം നടത്തും.
ഉത്തരേന്ത്യന്‍ സംസ്ഥാനങ്ങളിലെ കുടിവെള്ളവും വിദ്യാഭ്യാസവും എത്താത്ത ഗ്രാമങ്ങളിലേക്ക് ഇവ എത്തിക്കുന്നതിനായി പദ്ധതി പ്രഖ്യാപനങ്ങളും അറബ് ഇന്ത്യന്‍ സംസ്‌കാരങ്ങള്‍ സമന്വയിപ്പിച്ചുള്ള പരിപാടികളും അരങ്ങേറും.
ഇതോടനുബന്ധിച്ച് മെയ് 10ന് സെന്റര്‍ ഹാളില്‍ നടക്കുന്ന ശൈഖ് സായിദിന്റെ ഫോട്ടോ എക്‌സിബിഷന്‍ നിയമസഭാ സ്പീക്കര്‍ പി. രാമകൃഷ്ണന്‍ ഉദ്ഘാടനം ചെയ്യും.
11ന് സൗജന്യ മെഡിക്കല്‍ ക്യാംപും നാല് മണി മുതല്‍ ഇന്തോ അറബ് സാംസ്‌കാരികോത്സവവും നടക്കും.