ടൊറന്റോ: കാനഡയിലെ എഡ്മന്റണില്‍ ഇന്ത്യന്‍ യുവതി കൊല്ലപ്പെട്ടു. പഞ്ചാബ് ലുധിയാന ജില്ലയിലെ സമ്രാല സ്വദേശിയായ ദമന്‍പ്രീത് കൗര്‍ (23) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് യുവതിയുടെ പങ്കാളിയായ 22കാരനായ റിതീഷ് കുമാറിനെ കൊലപാതക കുറ്റം ചുമത്തി പൊലിസ് അറസ്റ്റ് ചെയ്തു.

ജൂലൈ 9 നാണ് സംഭവം. ദമന്‍പ്രീത് കൗറിനെ വൈകീട്ട് സില്‍വര്‍ബെറി മേഖലയിലെ വീട്ടില്‍ ഗുരുതര പരുക്കുകളോടെ അബോധാവസ്ഥയില്‍ കണ്ടെത്തുകയായിരുന്നു. യുവതിയെ ആശുപത്രിയില്‍ പ്രവേശിപ്പിച്ചെങ്കിലും മൂന്ന് ദിവസത്തിന് ശേഷം മരണത്തിന് കീഴടങ്ങി. 

തുടര്‍ന്ന് നടത്തിയ പോസ്റ്റ്‌മോര്‍ട്ടം റിപ്പോര്‍ട്ടില്‍ യുവതിയുടെ മരണം കൊലപാതകമാണെന്ന് സ്ഥിരീകരിച്ചു. ശ്വാസംമുട്ടിച്ചാണ് കൊലപ്പെടുത്തിയെന്ന് പൊലിസ് അറിയിച്ചു.

പിന്നാലെ ജൂലൈ 22 നാണ് യുവതിയുടെ പങ്കാളിയായ റീതീഷ് കുമാറിനെ പൊലിസ് അറസ്റ്റ് ചെയ്തത്. കൊലപാതകത്തില്‍ മറ്റാര്‍ക്കും പങ്കില്ലെന്ന് പൊലിസ് അറിയിച്ചു. 

ദാമന്‍പ്രീത് കൗറിന്റെ മൃതദേഹം നാട്ടിലെത്തിക്കുന്നതിന് വിവിധ സംഘടനകളുടെ നേതൃത്വത്തില്‍ ധനസമാഹരണം നടക്കുന്നുണ്ട്. മൃതദേഹം നാട്ടിലെത്തിക്കാനുള്ള ഭാരിച്ച തുക കുടുംബത്തിന് താങ്ങാനാകാത്ത സാഹചര്യത്തിലാണ് ധനസമാഹരണം.