കോഴിക്കോട്: പ്രമുഖ സൂഫിവര്യനും പണ്ഡിതനുമായിരുന്ന അത്തിപ്പറ്റ മുഹ്‌യിദ്ദീന്‍കുട്ടി മുസ്‌ലിയാരുടെ ജീവിതവും പ്രവര്‍ത്തനവും ഉള്‍പ്പെടുത്തിയ സ്മരണിക 'ഇബാദുറഹ്മാന്‍' പുറത്തിറക്കി. നൂറിലധികം പ്രമുഖ എഴുത്തുകാരുടെ അത്തിപ്പറ്റ ഉസ്താദുമായുള്ള വ്യക്തിബന്ധങ്ങളും അനുഭവങ്ങളും ഉള്‍ക്കൊള്ളുന്നതാണ് സ്മരണിക. മുക്കം ദാറുസ്വലാഹ് ഇസ്‌ലാമിക് അക്കാദമിയാണ് പ്രസാധകര്‍.

ജീവിതശൈലി, പെരുമാറ്റശീലം, ആത്മീയശീലം, വിദ്യാഭ്യാസ പ്രവര്‍ത്തനങ്ങള്‍, മത ഭൗതിക രാഷ്ട്രീയ വീക്ഷണങ്ങള്‍, നടന്നു തീര്‍ത്ത വഴി അടയാളങ്ങള്‍, നേടിയെടുത്ത ഔന്നത്യം തുടങ്ങിയ അത്തിപ്പറ്റ ഉസ്താദിന്റെ ചലനങ്ങള്‍ ഗ്രന്ഥത്തില്‍ വിശദീകരിക്കുന്നുണ്ട്.
പാണക്കാട് സയ്യിദ് ഹൈദരലി ശിഹാബ് തങ്ങള്‍ മുക്കം വി. മോയിമോന്‍ ഹാജിക്ക് നല്‍കി പ്രകാശനം നിര്‍വഹിച്ചു. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി.

ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സ്വാദിഖ് മുസ്‌ലിയാര്‍, സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജന. സെക്രട്ടറി എം.ടി അബ്ദുല്ല മുസ്‌ലിയാര്‍, ഉമര്‍ ഫൈസി മുക്കം, ബഹാഉദ്ദീന്‍ മുഹമ്മദ് നദ്‌വി, പിണങ്ങോട് അബൂബക്കര്‍, ചെമ്മുക്കന്‍ കുഞ്ഞാപ്പു ഹാജി, കളാവ് സൈതലവി മുസ്‌ലിയാര്‍, ഹംസ ബാഫഖി തങ്ങള്‍, അബ്ദുസ്സമദ് പൂക്കോട്ടൂര്‍ പ്രസംഗിച്ചു. എഡിറ്റര്‍ മുക്കം സലാം ഫൈസി ഗ്രന്ഥപരിചയം നടത്തി.