ജിദ്ദ: എക്‌സിറ്റ് - റീ എന്‍ട്രി, ഫൈനല്‍ എക്‌സിറ്റ് എന്നീ വിസകള്‍ ലഭിച്ച ശേഷം രാജ്യത്തിന് പുറത്ത് പോകാന്‍ കഴിയാതെ സഊദിയില്‍ തന്നെ കഴിയുന്ന പ്രവാസികള്‍ എത്രയും വേഗം അത് റദ്ദ് ചെയ്യണമെന്ന് പാസ്‌പോര്‍ട്ട് ഡയരക്ടറേറ്റ് (ജവാസാത്ത്) അറിയിച്ചു. എക്‌സിറ്റ് വിസയുടെ കാലാവധി അവസാനിക്കുന്നതിന് മുന്‍പായിരിക്കണം ക്യാന്‍സല്‍ ചെയ്യേണ്ടത്. ഇല്ലെങ്കില്‍, നിയമ ലംഘനമായി കണക്കാക്കുകയും നിയമാനുസൃതമുള്ള പിഴയും ശിക്ഷയും അനുഭവിക്കേണ്ടി വരുമെന്ന് പാസ്‌പോര്‍ട്ട് വിഭാഗം മുന്നറിയിപ്പും നല്‍കി. കൊവിഡ് വ്യാപനം തടയുന്നതിനുള്ള മുന്‍കരുതല്‍ നടപടികളുടെ ഭാഗമായി സഊദി അധികൃതര്‍ രാജ്യാന്തര യാത്രാ സര്‍വിസുകള്‍ നിര്‍ത്തലാക്കിയതിന്റ പശ്ചാത്തലത്തിലാണ് പാസ്‌പോര്‍ട്ട് വിഭാഗത്തിന്റെ പ്രത്യേക അറിയിപ്പ്. വിമാനങ്ങളും മറ്റും സര്‍വിസ് നിര്‍ത്തലാക്കിയതിനാല്‍ എക്‌സിറ്റ് വിസ നേടിക്കഴിഞ്ഞ ഒട്ടേറെ പേര്‍ക്കാണ് യാത്ര വേണ്ടെന്ന് വെക്കേണ്ടി വന്നത്.
അതേ സമയം, സഊദിയില്‍ ഉംറക്കെത്തി തിരിച്ചുപോകാന്‍ കഴിയാതെ ഇപ്പോഴും രാജ്യത്ത് കഴിയുന്നവര്‍ ഓണ്‍ലൈനില്‍ പേര് രജിസ്റ്റര്‍ ചെയ്യണമെന്നും അധികൃതര്‍ അറിയിച്ചു. ഇതിന് പ്രത്യേക സംവിധാനം മഖാം സൈറ്റില്‍ ഏര്‍പ്പെടുത്തി. രാജ്യം, പാസ്‌പോര്‍ട്ട് നമ്പര്‍, സഊദിയിലേക്ക് പുറപ്പെട്ട നഗരം, മൊബൈല്‍ നമ്പര്‍ എന്നിവ രേഖപ്പെടുത്തിയാല്‍ മതി.