മലപ്പുറം: ദേശീയ ഫുട്‌ബോളില്‍ റഫറിയാകാന്‍ ജില്ലയില്‍നിന്നു മുഹമ്മദ് അമീനും. കാല്‍പ്പന്തുകളിയില്‍ ജില്ലാ സ്‌കൂള്‍ ടീം മുതല്‍ പോണ്ടിച്ചേരി സെന്‍ട്രല്‍ യൂനിവേഴ്‌സിറ്റിയും കടന്നു വിവിധ ടൂര്‍ണമെന്റുകളില്‍ ബൂട്ടണിഞ്ഞ മുഹമ്മദ് അമീന്‍ മലപ്പുറം കല്‍പകഞ്ചേരി സ്വദേശിയാണ്.
ഐ ലീഗ്, ഐ.എസ്.എല്‍, സന്തോഷ് ട്രോഫി തുടങ്ങി രാജ്യാന്തര ടൂര്‍ണമെന്റുകള്‍ ഉള്‍പ്പെടെയുള്ള ദേശീയ മത്സരങ്ങള്‍ നിയന്ത്രിക്കുന്ന റഫറിയായിട്ടാകും ഇനി അമീനും അറിയപ്പെടുക. മധ്യപ്രദേശിലെ ഗ്വോളിയാറിലും ഗോവയിലുമായി നടന്ന ദീര്‍ഘനാളത്തെ റഫറീ ക്ലിനിക്കുകളില്‍വച്ച് തിയറി ഉള്‍പ്പെടെയുള്ള കഠിനമായ ഫിറ്റ്‌നസ് പ്രാക്ടിക്കല്‍ ടെസ്റ്റുകളെ അതിജീവിച്ചാണ് മുഹമ്മദ് അമീന്‍ ദേശീയ റഫറി പട്ടം കരസ്ഥമാക്കിയത്.
എടക്കുളം കെ.ഐ.എച്ച്.എസ്, കല്‍പകഞ്ചേരി ജി.വി.എച്ച്.എസ് തുടങ്ങിയ സ്‌കൂളുകളില്‍നിന്നു പഠനവും തിരൂരങ്ങാടി പി.എസ്.എം.ഒ കോളജിനിന്ന് ഗണിതശാസ്ത്രത്തില്‍ ബിരുദവും തമിഴ്‌നാട് അണ്ണാമലൈ യൂനിവേഴ്‌സിറ്റി, പോണ്ടിച്ചേരി സെന്‍ട്രല്‍ യൂനിവേഴ്‌സിറ്റി എന്നിവയില്‍നിന്നു കായിക വിദ്യാഭ്യാസത്തില്‍ ബിരുദ, ബിരുദാനാന്തര ബിരുദവും പൂര്‍ത്തീകരിച്ചു. പിന്നീട് യു.ജി.സി നെറ്റ് യോഗ്യതയും സ്‌പോര്‍ട്‌സ് അതോറിറ്റി ഓഫ് ഇന്ത്യയുടെ എന്‍.ഐ.എസ് ഡിപ്ലോമയും ഓള്‍ ഇന്ത്യാ ഫുട്‌ബോള്‍ ഫെഡറേഷന്റെ ഡി ലൈസന്‍സും കരസ്ഥമാക്കി. ഇപ്പോള്‍ തവനൂര്‍ കാര്‍ഷിക സര്‍വകലാശാലയിലെ കായിക വിഭാഗം അസിസ്റ്റന്റ് പ്രൊഫസറാണ്.
കല്‍പകഞ്ചേരി ചേരൂരാലിലെ വള്ളിക്കാടന്‍ മുഹമ്മദ് അബ്ദുല്‍ ഖാദര്‍-സുബൈദ ദമ്പതികളുടെ മകനാണ്. ഭാര്യ: ഹന്നത്ത്. ഐഷ മെഹ്‌വിഷ് മകളും അഷ്‌റഫ്, നൂര്‍ജഹാന്‍ എന്നിവര്‍ സഹോദരങ്ങളുമാണ്.