ലണ്ടൻ: ആഗോളതലത്തിൽ കൊറോണ വൈറസ് ബാധയേറ്റ് മരിച്ചവരുടെ എണ്ണം ഇരുപതിനായിരം കവിഞ്ഞു. 20,499 പേരാണ് ഇതുവരെ മരണത്തിന് കീഴടങ്ങിയത്. 450,000 പേർക്ക് അസുഖം ബാധിച്ചിട്ടുണ്ട്.

മരണ നിരക്കിൽ ചൈനയെ പിന്നിലാക്കി സ്പെയിൻ രണ്ടാമതെത്തി. 3,434 പേരാണ് ഇതുവരെ സ്പെയിനിൽ മരിച്ചത്. കഴിഞ്ഞ 24 മണിക്കൂറിനിടെ മാത്രം 738 മരണങ്ങളാണ് രാജ്യത്ത് റിപ്പോർട്ട് ചെയ്തത്. കൊറോണയുടെ പ്രഭവ രാജ്യമായ ചൈനയിൽ 3281 പേരാണ് മരിച്ചത്.

സ്പാനിഷ് ഉപപ്രധാനമന്ത്രി കാർമൻ കാൽവോയ്ക്കും വൈറസ് ബാധ സ്ഥിരീകരിച്ചിട്ടുണ്ട്. ഇവർ ആശുപത്രിയിൽ ക്വാറന്റൈനിലാണ്.

ഇറ്റലിയിൽ 6,820 പേർ കൊവിഡ് ബാധിച്ചെന്നാണ് റിപ്പോർട്ട്. 24 മണിക്കൂറിനിടെ 683 മരണങ്ങളാണ് റിപ്പോർട്ട് ചെയ്തത്.

അമേരിക്കയിൽ ഒറ്റ ദിവസത്തിനിടയിൽ 10000 കൊവിഡ് കേസുകളാണ് റിപ്പോർട്ട് ചെയ്തത്. 54453 പേർക്കാണ് അമേരിക്കയിൽ ഇതുവരെ കൊവിഡ് റിപ്പോർട്ട് ചെയ്തത്. 737 മരണങ്ങളും ഇവിടെ റിപ്പോർട്ട് ചെയ്തു. കൊവിഡ് 19 ന്റെ അടുത്ത ആഘാതം ഏറ്റവും കൂടുതൽ അനുഭവിക്കാൻ പോകുന്നത് അമേരിക്കയാകുമെന്ന് ലോകാരോഗ്യസംഘടനയുടെ മുന്നറിയിപ്പുണ്ടായിരുന്നു.

ആകെ കൊവിഡ് ബാധിതരുടെ എണ്ണത്തിൽ ചൈനയാണ് മുന്നിലെങ്കിലും പുതുതായി രോഗം സ്ഥിരീകരിച്ചവരുടെ എണ്ണം ഇവിടെ വളരെ കുറവാണ്. ഇന്നലെ 67 പേർക്ക് മാത്രമാണ് രോഗം കണ്ടെത്തിയത്. ഇക്കാര്യത്തിൽ അമേരിക്കയാണ് ഭീതിപ്പെടുത്തി മുന്നേറുന്നത്. 11,192 പേർക്കാണ് ഇന്നലെമാത്രം അമേരിക്കയിൽ രോഗം സ്ഥിരീകരിച്ചത്. സ്‌പെയിനും (7,457), ഇറ്റലിയും (5,210), ജർമനിയും (4332), ഫ്രാൻസും (2929) തൊട്ടുപിറകിലുണ്ട്.