കൊണ്ടോട്ടി: അബൂദാബിയില്‍ നിന്ന് കരപ്പൂരിലേക്ക് പുറപ്പെട്ട ഇത്തിഹാദ് എയര്‍ വിമാനത്തിലെ യാത്രക്കാരന്‍ യാത്രക്കിടെ മരിച്ചതിനെ തുടര്‍ന്ന് വിമാനം മുംബൈയില്‍ ഇറക്കി.
തലശ്ശേരി ചൊക്ലി സ്വദേശി കലന്തര്‍ കുഞ്ഞ് അബു(74)ആണ് വിമാന യാത്രക്കിടെ മരിച്ചത്. ഈ സമയം വിമാനം മുംബൈ വിമാനത്താളത്തിന്റെ പരിധിയിലായിരുന്നു. വിമാന പൈലറ്റ് ഉടന്‍ മുംബൈ എയര്‍ട്രാഫിക് കണ്‍ട്രോളുമായി ബന്ധപ്പെട്ട് വിമാനം അടിയന്തര ലാന്റിങ് നടത്തുകയായിരുന്നു. തുടര്‍ന്ന് മൃതദേഹം പുറത്തിറക്കി.
ഇന്നലെ പുലര്‍ച്ചെ മൂന്ന് മണിക്ക് കരിപ്പൂരിലെത്തി 4.40ന് തിരിച്ച് അബൂദബിയിലേക്ക് പോകേണ്ട വിമാനമായിരുന്നു ഇത്. വിമാനം അനിശ്ചിതമായി മുംബൈയില്‍ നിര്‍ത്തിയതോടെ വിമാന പൈലറ്റിന്റെ ഡ്യൂട്ടി സമയവും കഴിഞ്ഞു.
ഇതോടെ കരിപ്പൂരിലേക്കുളള യാത്രവൈകി.പിന്നീട് പുതിയ പൈലറ്റിനെ എത്തിച്ചാണ് വിമാനം ഉച്ചക്ക് 12.30 കരിപ്പൂരിലെത്തിച്ചത്. ഈ വിമാനത്തില്‍ അബൂദബിയിലേക്ക് പോകാനായി 137 യാത്രക്കാര്‍ കരിപ്പൂരിലെത്തിയിരുന്നു.
വിമാനത്തിന്റെ തിരിച്ചുപോക്കും പൈലറ്റില്ലാത്തതിനാല്‍ മുടങ്ങി.
തുടര്‍ന്ന് യാത്രക്കാരില്‍ 8 പേരെ മറ്റുവിമാനത്തില്‍ യാത്രയാക്കി. ശേഷിച്ചവരെ ഹോട്ടലിലേക്ക് മാറ്റി.