കാസര്‍കോട്: പ്രമുഖ മതപണ്ഡിതനും സമസ്ത സീനിയര്‍ ഉപാധ്യക്ഷനുമായിരുന്ന ചെമ്പരിക്ക സി.എം.അബ്ദുല്ല മൗലവിയുടെ കൊലപാതകവുമായി ബന്ധപ്പെട്ട് നാളെ സി.ബി.ഐ.കൊച്ചി യൂനിറ്റ് ഓഫിസിലേക്ക് മാര്‍ച്ചും ധര്‍ണയും നടക്കും. സി.എം.അബ്ദുല്ല മൗലവിയുടെ കുടുംബം, ജനകീയ ആക്ഷന്‍ കമ്മിറ്റി എന്നിവയുടെ നേതൃത്വത്തിലാണ് മാര്‍ച്ചും ധര്‍ണയും.
കേസില്‍ സി.ബി.ഐയുടെ ഒന്നാം സംഘം നല്‍കിയ അന്വേഷണ റിപ്പോര്‍ട്ട് എറണാകുളം സി.ജെ.എം.കോടതി തള്ളുകയും കേസില്‍ വിദഗ്ധ സംഘത്തിന്റെ സഹായത്തോടെ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ഉത്തരവിടുകയും ചെയ്തിരുന്നു. എന്നാല്‍ കേസിലെ കക്ഷികള്‍ ഹൈക്കോടതിയില്‍ ആവശ്യപ്പെട്ട ഉന്നതതല അന്വേഷണം നടത്താതെ തന്നെ കേസന്വേഷണം അവസാനിപ്പിക്കാനുള്ള ശ്രമമാണ് സി.ബി.ഐ നടത്തി വരുന്നതെന്ന് ആരോപണം ഉയരുന്നുണ്ട്.
ഇപ്പോള്‍ അന്വേഷണം നടത്തുന്നവരെ മാറ്റി നിര്‍ത്തി സി.ബി.ഐയുടെ ഉന്നത ഉദ്യോഗസ്ഥരുടെ നേതൃത്വത്തില്‍ കേസന്വേഷണം നടത്തണമെന്നാവശ്യപ്പെട്ടാണ് നാളെ സി.ബി.ഐ കൊച്ചി യൂനിറ്റിന് മുന്നില്‍ ധര്‍ണ നടത്തുന്നത്.