തിരുവനന്തപുരം: കൊവിഡ് 19 വ്യാപനം തടയുന്നതിന്റെ ഭാഗമായുള്ള നിയന്ത്രണങ്ങള്‍ ശക്തിപ്പെടുത്തുന്നതിനായി സംസ്ഥാന സര്‍ക്കാര്‍ കൊണ്ടുവന്ന പകര്‍ച്ചവ്യാധി ഓര്‍ഡിനന്‍സിന്റെ പേരില്‍ വാക്‌പോര്. കേന്ദ്ര മന്ത്രി വി. മുരളീധരന്‍ ഓര്‍ഡിനന്‍സിനെ വിമര്‍ശിച്ചപ്പോള്‍, മുരളീധരനെ വിമര്‍ശിച്ച് മന്ത്രി എ.കെ ബാലന്‍ രംഗത്തെത്തി.
ഇന്ത്യന്‍ ശിക്ഷാ നിയമത്തിലെ വകുപ്പുകള്‍ പര്യാപ്തമാണെന്നിരിക്കെ, അത് നടപ്പാക്കാന്‍ മടികാണിക്കുന്ന സംസ്ഥാന സര്‍ക്കാരിന്റെ തീരുമാനം മലയാളികളെ പൊട്ടന്‍കളിപ്പിക്കാനാണെന്നും പബ്ലിസിറ്റി സ്റ്റണ്ടാണെന്നും മുരളീധരന്‍ ഫേസ്ബുക്കില്‍ കുറിച്ചു. കേന്ദ്രസര്‍ക്കാര്‍ ലോക്ഡൗണ്‍ ഓര്‍ഡറിനൊപ്പം അനുഛേദമായി ചേര്‍ത്തത് കാണാതെയാണ് സംസ്ഥാന സര്‍ക്കാരിന്റെ തീരുമാനമെന്നും മുരളീധരന്‍ ആക്ഷേപിച്ചു
പരാമര്‍ശം പിന്‍വലിക്കാന്‍ മുരളീധരന്‍ തയാറാകണമെന്ന് എ.കെ ബാലന്‍ ആവശ്യപ്പെട്ടു. മുഖ്യമന്ത്രിയോടുള്ള പ്രതികാരം പ്രകടിപ്പിക്കാനുള അവസരമായി കൊവിഡ് ദുരന്ത കാലത്തെ കാണരുതെന്നും മന്ത്രി ബാലന്‍ പറഞ്ഞു.
സംസ്ഥാന സര്‍ക്കാരിന്റെ നടപടിയെ വിമര്‍ശിച്ച വി. മുരളീധരന് ഫേസ്ബുക്കിലൂടെ രൂക്ഷമായ വിമര്‍ശനം ഏറ്റുവാങ്ങേണ്ടിയും വന്നു. പിന്നാമ്പുറത്തു കൂടി മന്ത്രിയായ ആള്‍ക്ക് തെരഞ്ഞെടുക്കപ്പെട്ട സര്‍ക്കാരിനെ വിമര്‍ശിക്കാന്‍ അവകാശമില്ലെന്നും ഒരു പഞ്ചായത്ത് തെരഞ്ഞെടുപ്പിലെങ്കിലും ജയിച്ചു കാണിക്കൂവെന്നും വിമര്‍ശകര്‍ മുരളീധരനോട് ആവശ്യപ്പെടുന്നുണ്ട്. പകര്‍ച്ചവ്യാധി പ്രതിരോധത്തിനുള്ള നടപടികള്‍ കര്‍ശനമാക്കുന്ന ഓര്‍ഡിനന്‍സ് പുറപ്പെടുവിക്കാന്‍ കഴിഞ്ഞ ദിവസമാണ് മന്ത്രിസഭാ യോഗം തീരുമാനിച്ചത്.