സൂറിച്ച്: വടക്കുപടിഞ്ഞാറന്‍ സ്വിറ്റ്‌സര്‍ലന്റ് നഗരമായ ബാസെലിലെ കഫേയിലുണ്ടായ വെടിവയ്പില്‍ രണ്ടുപേര്‍ കൊല്ലപ്പെട്ടു. പരുക്കേറ്റവരില്‍ ഒരാളുടെ നില ഗുരുതരമാണ്. വ്യാഴാഴ്ച രാത്രി 8.15ഓടെ കഫേ 56ലാണ് സംഭവം. രണ്ടുപേരാണ് അക്രമത്തിനുപിന്നില്‍. ഇവര്‍ നിരവധി തവണ വെടിവയ്പ് നടത്തിയതായി പൊലിസ് പറഞ്ഞു.
കൊല്ലപ്പെട്ടവരും പരുക്കേറ്റവരും കഫേയിലെത്തിയ സാധാരണക്കാരാണ്. വെടിവയ്പിനുശേഷം അക്രമികള്‍ റെയില്‍വേ സ്റ്റേഷനിലേക്ക് പോവുകയായിരുന്നു. ആക്രമണത്തിനുപിന്നിലെ കാരണം വ്യക്തമല്ലെന്നും അന്വേഷണം നടക്കുകയാണെന്നും പൊലിസ് പറഞ്ഞു. ആക്രമണത്തിന് ഇരയായ കഫേ നേരത്തെ മയക്കുമരുന്ന് വ്യാപാരവുമായി ബന്ധപ്പെട്ട് ആരോപണമുയര്‍ന്ന സ്ഥാപനമാണ്. എന്നാല്‍, പുതിയയാളാണ് ഇപ്പോള്‍ സ്ഥാപനത്തിന്റെ ഉടമയെന്ന് പ്രാദേശിക ദിനപത്രം ഡെയ്‌ലി ബാസ്‌ലര്‍ റിപ്പോര്‍ട്ട് ചെയ്തു.