പട്ടാമ്പി: വറ്റി വരണ്ടു കിടന്നിരുന്ന ഭാരതപ്പുഴയില്‍ മലമ്പുഴ ഡാം തുറന്നതോടെ നീരൊഴുക്ക് വര്‍ധിച്ചു. കഴിഞ്ഞ ദിവസം ഡാം തുറന്നതോടെ ഇന്നലെ ഭാരതപ്പുഴയില്‍ ഉണ്ടായ നീരൊഴുക്ക് കര്‍ഷകര്‍ക്കും കടുത്ത ജലക്ഷാമം നേരിടുന്ന പരിസരനിവാസികള്‍ക്കും ആശ്വാസമായി. പട്ടാമ്പി താലൂക്കില്‍ കഴിഞ്ഞവര്‍ഷത്തേക്കാളേറെ ഇത്തവണ ജലക്ഷാമം രൂക്ഷമാണ്.  ജലഅതോറിറ്റി വഴിയുള്ള കുടിവെള്ള വിതരണവും ഇതുമൂലം തടസപ്പെട്ടനിലായിലായിരുന്നു. ഇതിന്റെ ഭാഗമായി നഗരസഭയുടെ നേതൃത്വത്തില്‍ ജനകീയ തടയണ നിര്‍മിച്ചിരുന്നെങ്കിലും വേണ്ടത്ര വെള്ളം നിളയില്‍ ഇല്ലാത്തതിനാല്‍ തടയണയുടെ പ്രവര്‍ത്തനം കാര്യക്ഷമമായില്ല . മുന്‍സിപ്പല്‍ ചെയര്‍മാന്‍ കെ.പി വാപ്പുട്ടി ഇതു സംബന്ധിച്ച് അധികാരികളുടെ ശ്രദ്ധയില്‍പ്പെടുത്തുകയും മലമ്പുഴ ഡാം തുറക്കണമെന്ന ആവശ്യം ഉന്നയിക്കുകയും ചെയ്തിരുന്നു.
ഷൊര്‍ണൂരിലും കടുത്ത ജലക്ഷാമം രൂക്ഷമായിരുന്നു. ചെറുതുരുത്തി ഭാഗത്തുള്ള ഭാരതപ്പുഴയിലും വെള്ളമില്ലാത്ത അവസ്ഥ വന്നതോടെ അധികാരികളുടെ ശ്രദ്ധയില്‍പ്പെട്ടതനുസരിച്ച് ഡാം തുറക്കാനുള്ള നടപടികളായത്.
ഡാം തുറന്നതോടെ ചെറുതുരുത്തിയും പട്ടാമ്പിയിലും ഭാരതപ്പുഴയിലെ നീരൊഴുക്ക് ഗണ്യമായി വര്‍ധിച്ചു. തടയണ തീര്‍ത്ത ഭാഗങ്ങളിലെല്ലാം വെള്ളം നിറഞ്ഞ് കവിഞ്ഞൊഴുകി. നിറഞ്ഞ് കവിഞ്ഞ തടയണ മുന്‍സിപ്പല്‍ ചെയര്‍മാന്‍ കെ.പി വാപ്പുട്ടി അടക്കമുള്ള ജനപ്രതിനിധികള്‍  സന്ദര്‍ശിച്ചു.