പാറ്റ്‌ന: ബിഹാറിലെ മോത്തിഹാരിയില്‍ നിയന്ത്രണം വിട്ട ബസ് മറിഞ്ഞതിനെത്തുടര്‍ന്നുണ്ടായ തീപിടുത്തത്തില്‍ 27 യാത്രക്കാര്‍ മരിച്ചു. മോത്തിഹാരിയിലെ ബെല്‍വാ ഗ്രാമത്തിനടുത്ത് എന്‍.എച്ച്് 26ല്‍ ആണ് അപകടം നടന്നത്. 32 യാത്രക്കാരുമായി മുസാഫര്‍പൂരില്‍ നിന്ന് ഡല്‍ഹിയിലേക്ക് പോകുന്ന സ്വകാര്യ ബസിനാണ് തീപ്പിടിച്ചത്.

ബസിലുണ്ടായിരുന്ന നാലുപേരെ മാത്രമേ രക്ഷിക്കാന്‍ സാധിച്ചുള്ളുവെന്നാണ് പൊലിസ് പറഞ്ഞത്. ഗുരുതരമായി പൊള്ളലേറ്റ ഇവരെ അടുത്തുള്ള ആശുപത്രിയില്‍ പ്രവേശിപ്പിച്ചിട്ടുണ്ട്. കനത്ത മഴ രക്ഷാപ്രവര്‍ത്തനത്തിന് തടസമായിരുന്നവെന്നും പൊലിസ് പറഞ്ഞു.

റോഡിലുണ്ടായിരുന്ന ഇരുചക്രവാഹനത്തിനെ രക്ഷിക്കാനുള്ള ഡ്രൈവറുടെ ശ്രമത്തിനിടെയാണ് അപകടം നടന്നതെന്ന് ദൃക്‌സാക്ഷികള്‍ പറഞ്ഞു. നിയന്ത്രണം വിട്ട ബസ് റോഡില്‍നിന്ന് പുറത്തേക്ക് മറയുകയായിരുന്നവെന്നും, രക്ഷക്കായി ആളുകള്‍ ഓടിക്കൂടും മുന്‍പേതന്നെ ബസിനു തീപിടിച്ചുവെന്നും അവര്‍ കൂട്ടുച്ചേര്‍ത്തു. മരണസംഖ്യ ഇനിയും കൂടാന്‍ സാധ്യതയുണ്ടെന്നാണ് റിപ്പോര്‍ട്ട്.