ചങ്ങനാശ്ശേരി: 350 പൊതി കഞ്ചാവുമായി യുവാവിനെ ചങ്ങനാശ്ശേരി എക്‌സൈസ് റെയ്ഞ്ച് ഇന്‍സ്‌പെക്ടര്‍ ആര്‍ ബിജു വര്‍ഗീസിന്റെ നേതൃത്വത്തിലുള്ള സംഘം അറസ്റ്റു ചെയ്തു. തൃക്കൊടിത്താനം കിളിമല വലിയപറമ്പില്‍ സനീഷ് തോമസ്(35)നെയാണ് പിടിയിലായത്.
കോടതിയില്‍ ഹാജരാക്കിയ ഇയാളെ റിമാന്റു ചെയ്തു. കോട്ടയം, ആലപ്പുഴ, പത്തനംതിട്ട കേന്ദ്രീകരിച്ച് കഞ്ചാവുകച്ചവടം നടത്തിവന്നിരുന്ന ഇയാള്‍ ചെറുകിട കച്ചവടക്കാര്‍ക്കു ഇവ എത്തിച്ചുകൊടുത്തിരുന്ന പ്രധാനകണ്ണിയാണെന്ന് എക്‌സൈസ് സംഘം പറഞ്ഞു. സ്‌കൂള്‍- കോളജ് വിദ്യാര്‍ത്ഥികള്‍ക്കും ഇയാള്‍ കഞ്ചാവ് എത്തിച്ചുകൊടുത്തിരുന്നു. തമിഴ്‌നാട്ടില്‍ നിന്നും കിലോയിക്ക് പതിനായിരം രൂപവരെ കൊടുത്തു വാങ്ങിയിരുന്ന കഞ്ചാവ് ഇടനിലക്കാര്‍ വഴി ഒരു ലക്ഷം രൂപയ്ക്കുവരെ വിറ്റിരുന്നതായി ഇയാള്‍ എക്‌സൈസിനോട് സമ്മതിച്ചു. ആഴ്ചയില്‍ മൂന്നുദിവസം വരെ ഇങ്ങനെ തമിഴ്‌നാട്ടില്‍ നിന്നും കഞ്ചാവ് എത്തിച്ചിരുന്നു. ഓരോ പ്രാവശ്യവും അഞ്ചുകിലോവരെയായിരുന്നു കൊണ്ടുവന്നിരുന്നത്. പൊതി ഒന്നിന് 300 രൂപ വരെ വാങ്ങിയിരുന്ന ഇയാള്‍ അതിര്‍ത്ഥിയില്‍ പരിശോധനയില്‍ കുടുങ്ങാതിരിക്കാന്‍ മറ്റുവഴികളിലൂടെയായിരുന്നു ഇവ എത്തിച്ചിരുന്നത്.
പ്രധാനമായും നീലചടയന്‍ ഇനത്തില്‍പ്പെട്ട കഞ്ചാവു വിറ്റിരുന്ന ഇയാള്‍ 20 വര്‍ഷത്തോളമായി ഈ ബിസിനസ്സില്‍ ഇടപെട്ടിട്ട്. ഇയാള്‍ക്കു മൂന്നു ഭാര്യമാരുള്ളതായും എക്‌സൈസിനോട് സമ്മതിച്ചു.