പട്ടാമ്പി: ഭിന്നശേഷിക്കാരുടെ സംരക്ഷണം ഉറപ്പുവരുത്തുന്നതിനായി ഏഴ് വിദ്യാര്‍ഥികളടങ്ങുന്ന സംഘം കാസര്‍കോഡ് മുതല്‍ തിരുവനന്തപുരം വരെ 850 കിലോമീറ്റര്‍ സൈക്കിള്‍ യജ്ഞത്തിന് പട്ടാമ്പിയില്‍ സ്വീകരണം നല്‍കി.
ഭിന്നശേഷിക്കാരും അവരുടെ സംരക്ഷകരും നേരിടുന്ന പ്രശ്‌നങ്ങള്‍ സമൂഹത്തില്‍ അവതരിപ്പിക്കുകയെന്നതാണ് വിദ്യാര്‍ഥിക്കൂട്ടായ്മയുടെ ലക്ഷ്യം. മൂലമറ്റം സെന്റ് ജോസഫ് അക്കാദമി ഓഫ് ഹയര്‍ എജുക്കേഷന്‍ ആന്‍ഡ് റിസര്‍ച്ച് കോളജിലെ ഫിസിക്കല്‍ എജുക്കേഷന്‍ വിദ്യാര്‍ഥിക്കൂട്ടായ്മയായ എക്‌സോസിയ, എസ്.ഒ.ബി, എ.ഐ.ഡി എന്നിവരുടെ സഹകരണത്തോടെയാണ് സൈക്കിള്‍ യാത്ര സംഘടിപ്പിച്ചിട്ടുള്ളത്. ഞായറാഴ്ച രാവിലെ കാസര്‍കോഡ് ജില്ലയിലെ ബേക്കലില്‍നിന്ന് ആരംഭിച്ച യാത്ര ആറിന് തിരുവനന്തപുരം ശംഖുമുഖം കടപ്പുറത്താണ് സമാപിക്കുക. സെന്റ് ജോസഫ് അക്കാദമിയിലെ ഫിസിക്കല്‍ എജുക്കേഷന്‍ വിദ്യാര്‍ഥികളായ എസ്. ദേവജിത്ത്, നിര്‍മല്‍ ആന്റണി, ഗോകുല്‍ കൃഷ്ണ, എസ്. അഖില്‍, എസ്.എസ് ബാദുഷാന്‍, ഫെറോലിന്‍ ഫ്രാന്‍സിസ്, ബി.എല്‍ ജിഷ്ണു എന്നീ വിദ്യാര്‍ഥികളാണ് സൈക്കിള്‍ റൈഡില്‍ പങ്കെടുക്കുന്നത്. ഒരുദിവസം 100 കിലോമീറ്ററോളം സഞ്ചരിക്കും വിധമാണ് യാത്ര ക്രമീകരിച്ചിട്ടുള്ളത്.