ബദിയടുക്ക: സാമൂഹിക ആരോഗ്യ കേന്ദ്രത്തില്‍ രാത്രികാല കിടത്തി ചികിത്സയില്ലാത്തതു രോഗികളെ ദുരിതത്തിലാക്കുന്നു. പാവപ്പെട്ട കുടുംബങ്ങള്‍ പ്രാഥമിക ചികിത്സക്കായി ആശ്രയിക്കുന്ന ഇവിടെ ആവശ്യത്തിനു ഡോക്ടര്‍മാരും ജീവനക്കാരുമില്ലാത്തതാണു കിടത്തി ചികിത്സ ആരംഭിക്കാതിരിക്കാനുള്ള കാരണം. കാസര്‍കോട് ബ്ലോക്ക് പഞ്ചായത്തിന്റെ കീഴിലുള്ള ആശുപത്രിയില്‍ സ്ത്രീകളേയും പുരുഷന്‍മാരേയും കിടത്തി ചികിത്സിക്കാനുള്ള 30 കിടക്കകള്‍ വീതമുള്ള പ്രത്യേകം വാര്‍ഡുകള്‍, ഓപറേഷന്‍ തിയറ്റര്‍, ലബോറട്ടറി, സാന്ത്വന പരിപാലന കേന്ദ്രം ജീവനക്കാര്‍ക്കു താമസിക്കുവാനുള്ള ക്വാര്‍ട്ടേഴ്‌സുകള്‍ എന്നീ സൗകര്യങ്ങള്‍ ഉണ്ടായിട്ടും ആരോഗ്യ വകുപ്പ് ആശുപത്രിയോട് അവഗണന കാട്ടുന്നതായാണ് ഇവിടെ എത്തുന്ന രോഗികളുടെയും നാട്ടുകാരുടെയും പരാതി.
എന്‍ഡോസള്‍ഫാന്‍ ദുരിത ബാധിത പ്രദേശമായ കുമ്പഡാജെ, എന്‍മകജെ, ബെള്ളൂര്‍, ബദിയടുക്ക എന്നീ പ്രദേശങ്ങളിലെ രോഗികള്‍ക്ക് ഏക ആശ്രയമായ ഈ ആരോഗ്യ കേന്ദ്രത്തില്‍ ദിവസേന നൂറു കണക്കിനാളുകളാണു ചികിത്സ തേടിയെത്തുന്നത്. ആശുപത്രി അധികൃതര്‍ ആവശ്യത്തിന് ഡോക്ടര്‍മാരും ജീവനക്കാരുമുണ്ടെന്നു അവകാശപ്പെടുമ്പോഴും രാത്രികാല കിടത്തി ചികിത്സ ആശുപത്രിയില്‍ നിഷേധിക്കുകയാണ്.
കിടത്തി ചികിത്സ നടത്തണമെന്നാവശ്യപ്പെട്ട് പല രാഷ്ട്രീയ പാര്‍ട്ടികളും വിവിധ തരത്തിലുള്ള സമരങ്ങള്‍ നടത്തിയിട്ടും അനുകൂലമായ നിലപാടുണ്ടായിട്ടില്ല. ആശുപത്രി മാനേജ്‌മെന്റ് കമ്മിറ്റി നിലവിലുണ്ടെങ്കിലും ഇതിന്റെ യോഗങ്ങള്‍ കൃത്യമായി ചേരാറില്ലെന്നും ആക്ഷേപമുണ്ട്.
ആശുപത്രിയില്‍ മെഡിക്കല്‍ ഓഫിസറടക്കം എട്ടു പേരുണ്ടെങ്കിലും ഇവരില്‍ ആറുപേര്‍ കരാറടിസ്ഥാനത്തില്‍ ജോലി ചെയ്യുന്നവരാണ്. നാല് സ്റ്റാഫ് നഴ്‌സുമാരില്‍ നിലവില്‍ രണ്ടു പേര്‍ മാത്രമാണ് ഇവിടുള്ളത്. സ്വന്തമായി ലാബുണ്ടായിട്ടും ചിലപ്പോള്‍ രക്ത പരിശോധനക്കായി രോഗികള്‍ക്കു കുറിപ്പെഴുതി കൊടുക്കുന്നതു വേണ്ട ജീവനക്കാരില്ലാത്തു മൂലമാണെന്നാണ് ഇവര്‍ പറയുന്നത്. രണ്ടു മാസം മുമ്പ് ജില്ലാ മെഡിക്കല്‍ ഓഫിസറുടെ സാന്നിധ്യത്തില്‍ ആശുപത്രിയില്‍ ചേര്‍ന്ന മാനേജ്‌മെന്റ് കമ്മിറ്റി യോഗത്തില്‍ രാത്രികാല കിടത്തി ചികിത്സ നടത്തുവാനുള്ള തീരുമാനമുണ്ടായിട്ടും നാളിതു വരെയായി നടപ്പായിട്ടില്ല.