ചിറ്റൂര്‍: വ്യാജലോട്ടറി ടിക്കറ്റ് നല്‍കി സമ്മാനത്തുക തട്ടിയെടുത്തയാളെ കൊഴിഞ്ഞാമ്പാറ പൊലിസ് അറസ്റ്റ് ചെയ്തു. എരുത്തേമ്പതി നേതാജി നഗര്‍ രങ്കസ്വാമി കൗണ്ടറുടെ മകന്‍ അറുമുഖനാണ് (37) പൊലിസ് പിടിയിലായത്.
വ്യാജലോട്ടറി ടിക്കറ്റ് നല്‍കി പലതവണകളിലായി പണം തട്ടിയെടുത്തെന്ന ലോട്ടറി ഏജന്‍സിയുടെ പരാതിയെ തുടര്‍ന്നാണ് അറസ്റ്റ്.
കൊഴിഞ്ഞാമ്പാറ അക്ഷയ ലോട്ടറി ഏജന്‍സി കൃഷ്ണദാസാണ് പരാതി നല്‍കിയത്. കോയമ്പത്തൂരില്‍നിന്നാണ് അറുമുഖന് വ്യാജലോട്ടറികള്‍ ലഭിക്കുന്നത്. ടിക്കറ്റില്‍ തിരുവനന്തപുരം ജില്ലാ ട്രഷറിയുടെ സീലും ഉണ്ട്.
അറുമുഖന് ടിക്കറ്റ് നല്‍കുന്ന ആളെക്കുറിച്ചും ഇടപാടുകളെകുറിച്ചും വിശദമായ അന്വേഷണം നടത്തിവരുന്നതായി കൊഴിഞ്ഞാമ്പാറ പൊലിസ് അറിയിച്ചു.