ഗൂഡല്ലൂര്‍(കോട്ടുമല ബാപ്പു മുസ്‌ലിയാര്‍ നഗര്‍): നൂറിന്റെ നിറവിലേക്ക് കാലെടുത്തുവെക്കുന്ന സമസ്ത കേരള ജംഇയ്യത്തുല്‍ ഉലമയുടെ ആദര്‍ശ വിശുദ്ധി വ്യക്തമാക്കിയ നീലഗിരി ജില്ലാ ആദര്‍ശ കാംപയിന് പ്രൗഡോജ്വല സമാപനം.
കഴിഞ്ഞ അഞ്ചുമാസമായി നടന്നുവന്ന പ്രചാരണ കാംപയിനാണ് ഇന്നലെ വൈകിട്ട് ഒന്നാംമൈലില്‍ പ്രത്യേകം സജ്ജമാക്കിയ കോട്ടുമല ബാപ്പു മുസ്‌ലിയാര്‍ നഗറില്‍ സമാപനമായത്. വൈകിട്ട് അഞ്ചിന് ആരംഭിച്ച മജ്‌ലിസുന്നൂര്‍ ആത്മീയ സംഗമത്തോടെയാണ് ആരംഭിച്ചത്. തുടര്‍ന്ന് മഗ്‌രിബ് നിസ്‌കാരനന്തരം സമാപനസമ്മേളനത്തിന് തുടക്കം കുറിച്ച് ഹാഫിള്‍ ജഅഫര്‍ ദാരിമി പെരിയശോല ഖിറാഅത് നടത്തി.
ജില്ലാ ജനറല്‍ സെക്രട്ടറി പി.കെ മുഹമ്മദലി ബാഖവി സ്വാഗതം പറഞ്ഞു. ജില്ലാ പ്രസിഡന്റ് സയ്യിദ് ഇമ്പിച്ചിക്കോയ തങ്ങള്‍ അധ്യക്ഷനായി. തുടര്‍ന്ന് സമസ്ത കേരളാ ജംഇയ്യത്തുല്‍ ഉലമാ സംസ്ഥാന പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ സമ്മേളനത്തിന്റെ ഉദ്ഘാടനം നിര്‍വഹിച്ചു. വിശ്വാസ സംരക്ഷണമാണ് സമസ്തയുടെ ലക്ഷ്യം. ആഗോളതലത്തില്‍ സമുദായം പലവിധ പരീക്ഷണങ്ങള്‍ നേരിട്ടു കൊണ്ടിരിക്കുന്ന വര്‍ത്തമാനഘട്ടത്തില്‍ മത സൗഹാര്‍ദവും ഐക്യവും ഊട്ടിയുറപ്പിക്കുന്നതിന് വേണ്ടിയാവണം നമ്മുടെ പ്രവര്‍ത്തനം.
സമസ്തയുള്ളിടത്തെല്ലാം മതസൗഹാര്‍ദവും കാണാനാകും. കേരളത്തിലും കര്‍ണാടകത്തിലെ മംഗലാപുരവും കുടകും ഉള്‍പ്പെടുന്ന പ്രദേശങ്ങളും തമിഴ്‌നാടിന്റെ നീലഗിരിയടക്കമുള്ള പ്രദേശങ്ങളിലും സമസ്തയുടെ വേരോട്ടം ആവോളമുണ്ട്. അതുകൊണ്ട് തന്നെയാണ് ഇവിടങ്ങളില്ലെല്ലാം മതസൗഹാര്‍ദവും തഴച്ചു വളരുന്നത്.
നിലവിലെ സാഹര്യത്തില്‍ രംഗപ്രവേശം ചെയ്തതും രാജ്യത്തിന്റെ ഐക്യവും അഖണ്ഡതയും തകര്‍ക്കുന്നവരുമായ പുത്തന്‍ പ്രസ്ഥാനക്കാരെ കരുതിയിരിക്കണമെന്നും തങ്ങള്‍ കൂട്ടിച്ചേര്‍ത്തു. എസ്.എം.എഫ് ജില്ലാ പ്രസിഡന്റ് കെ.പി മുഹമ്മദ് ഹാജി, വൈസ് പ്രസിഡന്റ് കെ. ബാപ്പുഹാജി, എന്‍. ഉമര്‍ ഫൈസി, ഉസ്മാന്‍ ദാരിമി, എസ്.വൈ.എസ് സംസ്ഥാന സെക്രട്ടറി എ.എം ശരീഫ് ദാരിമി, കെ.പി അലി മുസ്‌ലിയാര്‍, കുഞ്ഞാവ ഹാജി, എസ്.വൈ.എസ് ജില്ലാ പ്രസിഡന്റ് എം.സി സൈദലവി മുസ്‌ലിയാര്‍, യൂസുഫ് ഹാജി, അസീസ് മുസ്‌ലിയാര്‍, അലി ഉപ്പട്ടി, അംജദ് ഫൈസി, ഹനീഫ ഫൈസി, ഹനീഫ ദാരിമി, എസ്.കെ.എസ്.എസ്.എഫ് ജില്ലാ പ്രസിഡന്റ് ഫദ്‌ലുറഹ്മാന്‍ ദാരിമി, ജനറല്‍ സെക്രട്ടറി ജുദീര്‍ ഷാന്‍ മൗലവി, സുലൈമാന്‍, മുസ്താഖ് മാസ്റ്റര്‍, മോയിന്‍ ഫൈസി, സിദ്ധീഖ് ഹാജി, ഉണ്ണിമാന്‍, സലീം ഫൈസി, ശഫീഖ് റബ്ബാനി, ബഷീര്‍ റഹ്മാനി, അബ്ബാസ്, നാസര്‍ ഹാജി, ഹസന്‍കുട്ടി, മൊയ്തീന്‍കുട്ടി റഹ്മാനി, മുജീബ് റഹ്മാന്‍ മുസ്‌ലിയാര്‍, ഹസൈനാര്‍ ബാഖവി, അബുഹാജി സംസാരിച്ചു. സൈദലവി റഹ്മാനി നന്ദി പറഞ്ഞു.