കാബൂള്‍: അഫ്ഗാനിസ്ഥാനില്‍ ഏഴു ഇന്ത്യക്കാരെ തട്ടിക്കൊണ്ടുപോയതായി റിപ്പോര്‍ട്ട്. ബഗ്‌ലാന്‍ പ്രവിശ്യയിലാണ് ആയുധധാരികളായവര്‍ തട്ടിക്കൊണ്ടു പോയത്. തട്ടിക്കൊണ്ടു പോയവരില്‍ ഒരു അഫ്ഗാനിയടക്കം എട്ടു പേരെയാണ് തട്ടിക്കൊണ്ടുപോയത്.

വടക്കന്‍ ബഗ്‌ലാനിലെ സര്‍ക്കാര്‍ ഉടമസ്ഥതയിലുള്ള പവര്‍പ്ലാന്റിലേക്ക് ജോലിക്ക് പോകുമ്പോഴാണ് ഇവരെ തട്ടിക്കൊണ്ടുപോയത്. തട്ടിക്കൊണ്ടുപോകപ്പെട്ട അഫ്ഗാനി ഇവരുടെ ഡ്രൈവര്‍ ആണ്. തട്ടിക്കൊണ്ടു പോകപ്പെട്ടവര്‍ ഇന്ത്യക്കാരാണെന്ന് അഫ്ഗാനിലെ ഇന്ത്യന്‍ എംബസി സ്ഥിരീകരിച്ചു.

ദ അഫ്ഗാനിസ്ഥാന്‍ ബ്രഷ്‌ന ഷേര്‍ഖട് (DABS) എന്ന കമ്പനിയിലെ എന്‍ജിനീയര്‍മാരാണിവര്‍. സംഭവത്തിന് പിന്നില്‍ താലിബാനാണെന്ന് അനൗദ്യോഗിക സ്ഥിരീകരണം. 2016ല്‍ ഒരു ഇന്ത്യന്‍ രക്ഷാപ്രവര്‍ത്തകയെ തട്ടിക്കൊണ്ടുപോയിരുന്നു. 40 ദിവസത്തിന് ശേഷമാണ് ഇവരെ വിട്ടയച്ചത്.