മലപ്പുറം: നവീകരിച്ച് മൂന്നു വര്‍ഷമായിട്ടും കോട്ടപ്പടി ഫുട്‌ബോള്‍ മൈതാനം ഫുട്‌ബോള്‍ പരിശീലനത്തിന് തുറന്നുകൊടുക്കാത്തതില്‍ പ്രതിഷേധിച്ച് മലപ്പുറം ഫുട്‌ബോള്‍ ലവേഴ്‌സ് ഫോറത്തിന്റെ ആഭിമുഖ്യത്തില്‍ ഇന്നു പ്രതിഷേധ മാര്‍ച്ച് സംഘടിപ്പിക്കും. ഇന്റര്‍നാഷണല്‍ മൊയ്തീന്‍കുട്ടിയുടെ ചരമദിനമായ ഇന്ന് അദ്ദേഹത്തിന്റെ കീഴില്‍ പരിശീലിച്ച കളിക്കാരും പഴയകാല ഫുട്‌ബോള്‍ താരങ്ങളും വളര്‍ന്നുവരുന്ന താരങ്ങളും ഫുട്‌ബോള്‍ പ്രേമികളും അണിനിരക്കുന്ന മാര്‍ച്ചാണ് സംഘടിപ്പിക്കുന്നത്. വൈകിട്ട് 4.30ന് കിഴക്കേത്തല സുന്നിമഹല്‍ പരിസരത്തുനിന്ന് ആരംഭിക്കുന്ന പ്രകടനം മൈതാനത്തിനു സമീപം സിനിമാ പിന്നണി ഗായകനും സംഗീത സംവിധായകനും മുന്‍ സോക്കര്‍ മലപ്പുറം, സ്‌പോര്‍ട്ടിങ് ക്ലബുകളിലെ ഫുട്‌ബോള്‍ താരവുമായ ഷഹബാസ് അമന്‍ ഉദ്ഘാടനം ചെയ്യും. പഴയകാല ഫുട്‌ബോള്‍ താരം മലപ്പുറം അസീസ്, ഒ.എഫ്.പി.എ പ്രസിഡന്റ് പുതുശ്ശേരി കുഞ്ഞിമുഹമ്മദ്, സൂപ്പര്‍ അഷ്‌റഫ്, മുന്‍ ഫിഫ റഫറി അബ്ദുല്‍ ഹക്കീം തുടങ്ങിയവര്‍ സംബന്ധിക്കും.