കൊണ്ടോട്ടി: മഹാകവി മോയിന്‍കുട്ടി വൈദ്യര്‍ മാപ്പിളകലാ അക്കാദമിയുടെ വെബ്‌സൈറ്റ് ഉദ്ഘാടനം നാളെ നടക്കും. വൈകിട്ട് അഞ്ചിനു മലപ്പുറത്ത് അക്കാദമി ചെയര്‍മാന്‍ ടി.കെ ഹംസ ഉദ്ഘാടനം ചെയ്യും.
മന്ത്രിസഭയുടെ രണ്ടാം വാര്‍ഷികാഘോഷങ്ങളുടെ ഭാഗമായി ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പ് ഒരുക്കിയിരിക്കുന്ന പ്രദര്‍ശന-വിപണന മേളയില്‍ മലപ്പുറം, വയനാട്, കോഴിക്കോട്, കണ്ണൂര്‍, കാസര്‍കോട് ജില്ലകളില്‍ അക്കാദമി പ്രദര്‍ശനവും ഇശലിമ്പം മ്യൂസിക്കല്‍ മെഗാഷോയും ഒരുക്കിയിട്ടുണ്ട്. വെബ്‌സൈറ്റ് പ്രകാശനത്തോടൊപ്പം 'മാപ്പിളപ്പാട്ട്; മലയാള ചലച്ചിത്രത്തിലും നാടകങ്ങളിലും' എന്ന വിഷയത്തില്‍ സെമിനാറും നടത്തും.
വിവിധ വിഷയങ്ങളില്‍ ബഷീര്‍ ചുങ്കത്തറ, പുലിക്കോട്ടില്‍ ഹൈദരാലി, ഫൈസല്‍ എളേറ്റില്‍ എന്നിവര്‍ പ്രബന്ധങ്ങള്‍ അവതരിപ്പിക്കും. കെ.വി അബൂട്ടി അധ്യക്ഷനാകും.
വി.എം കുട്ടി, വിളയില്‍ ഫസീല, ഡോ. കെ.കെ മുഹമ്മദ് അബ്ദുല്‍ സത്താര്‍ സംബന്ധിക്കും. എന്‍. വേലായുധന്‍ എന്ന എന്‍.വി തുറക്കല്‍, ബീരാന്‍കോയ ഗുരുക്കള്‍, ആനക്കച്ചേരി അഹമ്മദ് കുട്ടി എന്ന കുഞ്ഞാന്‍ എന്നിവരെ ആദരിക്കും.
പഴയകാല മലയാള സിനിമകളിലെയും നാടകങ്ങളിലെയും മാപ്പിളപ്പാട്ടുകള്‍ കോര്‍ത്തിണക്കിയുള്ള ഇശലിമ്പം മ്യൂസിക്കല്‍ മെഗാഷോ വൈകിട്ട് ഏഴിനു നടക്കും.