വടകര: ചെമ്മരത്തൂരില്‍ റിട്ടയേര്‍ഡ് അധ്യാപകന്‍ കോറോത്ത് മീത്തല്‍ ബാലനെ (65) ആക്രമിച്ച് പരുക്കേല്‍പ്പിച്ചു. തലയ്ക്ക് സാരമായി പരുക്കേറ്റ ബാലനെ കോഴിക്കോട് സ്വകാര്യ ആശുപത്രിയില്‍ പ്രവേശിപ്പിച്ചു.
 ഞായറാഴ്ച രാത്രി ഏഴോടെയാണ് സംഭവം. ചെമ്മരത്തൂര്‍ ടൗണില്‍ നിന്നു ബൈക്കില്‍ വീട്ടിലേക്കു പോകുമ്പോഴാണ് രണ്ടു ബൈക്കിലെത്തിയവര്‍ തോടന്നൂര്‍ റോഡില്‍ ബാലനെ അക്രമിച്ചത്. ബൈക്ക് തടഞ്ഞ ശേഷം ബാലനെ ഇടിക്കട്ട കൊണ്ട് തലയ്ക്കും മുഖത്തും ഇടിക്കുകയായിരുന്നു.
ബൈക്ക് സമീപത്തെ തോട്ടിലെറിഞ്ഞു. ഓടിയെത്തിയ നാട്ടുകാര്‍ ഇദ്ദേഹത്തെ വടകര ജില്ലാ ആശുപത്രിയില്‍ പ്രവേശിപ്പിച്ചെങ്കിലും സ്ഥിതി ഗുരുതരമായതിനാല്‍ കോഴിക്കോട്ടേക്കു മാറ്റുകയായിരുന്നു. സി.പി.എം അനുഭാവിയായ ബാലന്റെ വീട്ടുമുറ്റത്തു നിര്‍ത്തിയ വാഹനങ്ങള്‍ കേടുവരുത്തിയ സംഭവത്തിന്റെ തുടര്‍ച്ചയാണെന്നാണ് കരുതുന്നത്. കഴിഞ്ഞ മാസമുണ്ടായ സംഭവത്തില്‍ പ്രതികളെക്കുറിച്ച് പൊലിസിനു സൂചന കിട്ടിയതായാണ് വിവരം.
ഡോഗ് സ്‌ക്വാഡും വിരലടയാള വിദഗ്ധരും പരിശോധന നടത്തിയിരുന്നു. അന്വേഷണത്തിന്റെ ഭാഗമായി രണ്ടു പേരോട് സ്‌റ്റേഷനിലെത്താന്‍ പൊലിസ് ഇന്നലെ ആവശ്യപ്പെട്ടിരിന്നു. ഇതിലെ വിദ്വേഷമാവാം ബാലനോട് തീര്‍ത്തതെന്നു കരുതുന്നു. അക്രമത്തെ തുടര്‍ന്നു പൊലിസ് സ്ഥലത്തെത്തി.