എളേറ്റില്‍: ജി.എം.യു.പി സ്‌കൂളില്‍ പഞ്ചായത്തിന്റെയും പി.ടി.എയുടെയും സഹകരണത്തോടെ വ്യത്യസ്തങ്ങളായ പദ്ധതികള്‍ നടപ്പിലാക്കുന്നതിന്റെ ഔദ്യോഗിക ഉദ്ഘാടനം പഞ്ചായത്ത് പ്രസിഡന്റ് എന്‍.സി ഉസൈന്‍ മാസ്റ്റര്‍ നിര്‍വഹിച്ചു. പഞ്ചായത്ത് ഒരു ലക്ഷം രൂപ ചെലവഴിച്ച് ഒരു ക്ലാസ് മുറി ഡിജിറ്റല്‍ സംവിധാനത്തിലേക്ക് മാറ്റുകയും സ്‌കൂളില്‍ ഉച്ചഭക്ഷണ പരിപാടിക്കാവശ്യമായ പാത്രങ്ങള്‍ നല്‍കുകയും ചെയ്തു.
പി.ടി.എയുടെ ആഭിമുഖ്യത്തില്‍ ജനകീയ പങ്കാളിത്തത്തോടെ മുഴുവന്‍ ക്ലാസ് മുറികളും നവീകരിക്കുന്ന ബൃഹത്പദ്ധതിക്കും തുടക്കമിട്ടു. ഇരുപത്തിയേഴ് ക്ലാസ്മുറികളില്‍ ആദ്യഘട്ടമെന്ന നിലയില്‍ രണ്ടണ്ട് ക്ലാസ് മുറികളാണ് ഈ രീതിയിലേക്ക് മാറിയത്. പഠിതാവിന് ഏറ്റവും മികച്ച പഠന അന്തരീക്ഷം ലഭിക്കത്തക്ക രീതിയില്‍ ചുമര്‍ചിത്രങ്ങള്‍, അലമാരകള്‍, കര്‍ട്ടനുകള്‍ എന്നിവ സജ്ജീകരിക്കുന്ന പദ്ധതിയാണിത്.
വാര്‍ഡ് മെമ്പര്‍ ആഷിഖ് റഹ്മാന്‍ അധ്യക്ഷനായി. കെ.കെ ജബ്ബാര്‍ മാസ്റ്റര്‍, പി. സുധാകരന്‍, സക്കരിയ്യ എളേറ്റില്‍, ഒ.പി കോയ മാസ്റ്റര്‍ സംബന്ധിച്ചു. ഹെഡ്മാസ്റ്റര്‍ എം. അബ്ദുല്‍ ഷുക്കൂര്‍ സ്വാഗതവും എം.ടി അബ്ദുസലീം നന്ദിയും പറഞ്ഞു.