കാസര്‍കോട്: ചെര്‍ക്കള ടൗണില്‍ ഐസ്‌ക്രീം പാര്‍ലറില്‍ വിദ്യാര്‍ഥികള്‍ക്കു നേരെയുണ്ടായ അക്രമക്കേസിലെ പ്രതി പൂനെ വിമാനത്താവളത്തില്‍ അറസ്റ്റില്‍. വിദേശത്തേക്കു കടക്കാനുള്ള ശ്രമത്തിനിടെയാണു പ്രതി പിടിയിലായത്. വിവരം ലഭിച്ചതിന്റെ അടിസ്ഥാനത്തില്‍ വിദ്യാനഗര്‍ പൊലിസ് പൂനയിലേക്കു പോയിട്ടുണ്ട്. ചെര്‍ക്കള റഹ്മത്ത് നഗറിലെ ടി.എ ഫൈസലി(31)നെയാണ് പൂനെ വിമാനത്താവളത്തിലെ എമിഗ്രേഷന്‍ വിഭാഗം പിടികൂടിയത്. കഴിഞ്ഞ നവംബര്‍ 28ന് എസ്.എഫ്.ഐ പ്രവര്‍ത്തകനും ചെര്‍ക്കള സൈനബ് ബി.എഡ് കോളജിലെ വിദ്യാര്‍ഥിയുമായ ബാഡൂരിലെ പൃഥ്വിരാജി (24) നെ കുപ്പി പൊട്ടിച്ച് കൈഞരമ്പ് മുറിക്കുകയും തലയ്ക്ക് അടിച്ചു പരുക്കേല്‍പിക്കുകയും ചെയ്ത കേസിലെ പ്രതിയാണ് പിടിയിലായ ഫൈസല്‍. സംഭവത്തിനു ശേഷം ഒളിവില്‍ പോയ ഫൈസലിനെ കണ്ടെത്താന്‍ ലൂക്കൗട്ട് നോട്ടിസ് പുറപ്പെടുവിച്ചിരുന്നു.
പ്രതിയെ കസ്റ്റഡിയില്‍ വാങ്ങിയ ശേഷം കാസര്‍കോട് കോടതിയില്‍ ഹാജരാക്കും. ഈ കേസില്‍ നേരത്തെ മുഖ്യപ്രതികളില്‍ ഒരാളായ ചെര്‍ക്കളയിലെ അബ്ദുല്‍ ലത്തീഫ് എന്ന ചില്ലറ ലത്തീഫി(28)നെ പൊലിസ് അറസ്റ്റു ചെയ്തിരുന്നു. കേസിലെ ഒന്നാം പ്രതിയായ മുള്ളു ഹാരിസിനെ കൂടി പിടികിട്ടാനുണ്ടെന്നു പൊലിസ് പറഞ്ഞു. വിദ്യാനഗര്‍ സി.ഐ ബാബു പെരിങ്ങേത്തിന്റെ നേതൃത്വത്തിലാണു കേസ് അന്വേഷിക്കുന്നത്. മറ്റു രണ്ടുപേര്‍ കൂടി കേസില്‍ പ്രതികളാണ്. ഇവരെയും പിടികൂടാനുണ്ട്.