പാലക്കാട്: 1990 ജനുവരി ഒന്നു മുതല്‍ പഞ്ചായത്തുകളിലെയും ഡിപ്പാര്‍ട്ട്‌മെന്റുകളിലെയും കംപയിന്റ് ഗ്രഡേഷന്‍ ലിസ്റ്റ് തയ്യാറാക്കി സര്‍വിസില്‍ നിന്നും വിരമിച്ച പഞ്ചായത്ത് ജീവനക്കാര്‍ക്ക് അതിന്റെ ആനുകൂല്യം നല്‍കാന്‍ സര്‍ക്കാര്‍ അടിയന്തര നടപടിസ്വീകരിക്കണമെന്ന് ഡി.സി.സി പ്രസിഡന്റ് വി.കെ ശ്രീകണ്ഠന്‍ ആവശ്യപ്പെട്ടു. കേരള പഞ്ചായത്ത് പെന്‍ഷനേഴ്‌സ് ഓര്‍ഗനൈസേഷന്‍ സംസ്ഥാന സ്‌പെഷ്യല്‍ കണ്‍വന്‍ഷന്‍ പാലക്കാട് ശിക്ഷക് സദനില്‍ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
സുപ്രീംകോടതി വിധിയുണ്ടായിട്ട് രണ്ടു വര്‍ഷമായിട്ടും വിരമിച്ച പഞ്ചായത്ത് ജീവനക്കാര്‍ക്ക് ആനുകൂല്യങ്ങള്‍ നല്‍കാത്ത സര്‍ക്കാര്‍, കോര്‍ട്ട് അലക്ഷ്യത്തെ ക്ഷണിച്ചുവരുത്തുകയാണെന്ന് അദ്ദേഹം പറഞ്ഞു. അധികാരത്തില്‍ വന്നാല്‍ എല്ലാം ശരിയാക്കും എന്ന് ജനങ്ങള്‍ക്ക് വാഗ്ദാനം നല്‍കിയ സര്‍ക്കാര്‍ കൊല്ലും, കൊലയും വിലക്കയറ്റവും സൃഷ്ടിച്ച് രൂക്ഷമായ കോടതിയുടെ പരാമര്‍ശങ്ങള്‍ ഏറ്റുവാങ്ങിക്കൊണ്ടിരിക്കുകയാണെന്നും ഇത് ജനാധിപത്യത്തോടുള്ള വെല്ലുവിളിയുമാണെന്ന് അദ്ദേഹം കുറ്റപ്പെടുത്തി.
എ.കെ സുല്‍ത്താന്‍ അധ്യക്ഷനായി. ബി. ശ്രീകുമാര്‍, ആര്‍. ചന്ദ്രമോഹന്‍, വി. മദനമോഹനന്‍, പി.വി സഹദേവന്‍, കെ. രാജശേഖരന്‍, പി. സുകുമാരപിള്ള, കെ. മുഹമ്മദ് അലി, കെ. കൃഷ്ണകുമാര്‍, എ. നാരായണന്‍ പ്രസംഗിച്ചു.
സംസ്ഥാന ഭാരവാഹികള്‍: എ.കെ സുല്‍ത്താന്‍(പ്രസി), കെ.സി ജയരാജ് കണ്ണൂര്‍, എം.ജി മണി കോട്ടയം, വി. മദനമോഹനന്‍ (വൈസ്പ്രസി), പി.ഐ ജോസ്, സൈനുദ്ദീന്‍കുഞ്ഞ്, പി. സുകുമാരപിള്ള(സംസ്ഥാന സെക്ര), എം. സുന്ദരേശന്‍ തിരുവനന്തപുരം (ട്രഷ).