നെയ്യാറ്റിന്‍കര: ആലുംമൂട് ജങ്ഷനിലുളള മൊബൈല്‍ ഫോണ്‍ ഷോപ്പില്‍ കവര്‍ച്ച നടത്തി പുറത്തിറങ്ങിയ മോഷ്ടാവിനെ പൊലിസ് കൈയോടെ പിടികൂടി. വെളളറട പന്നിമല കത്തിപ്പാറ ലൈനില്‍ അനിതാഭവനില്‍ സുനിലിന്റെ മകന്‍ സുധീഷ് (18) ആണ് പിടിയിലായത്.
വ്യാഴാഴ്ച രാത്രി 11 മണിയോടെ ആലുംമൂട്ടിലുളള മൊബൈല്‍ പാലസ് എന്ന കടയുടെ പൂട്ട് കുത്തിപ്പൊളിച്ച് അകത്ത് കടന്ന മോഷ്ടാവ് 45,000 രൂപ വിലവരുന്ന നാല് സെല്‍ ഫോണുകള്‍ കവര്‍ന്ന് പുറത്തിറങ്ങുമ്പോള്‍ അതുവഴി വന്ന മൊബൈല്‍ പട്രോളിങ് സംഘത്തിന്റെ മുന്നില്‍ പെടുകയായിരുന്നു. തൊണ്ടി മുതലുമായി പിടിയിലായ പ്രതിയെ ഇന്നലെ കോടതിയില്‍ ഹാജരാക്കി റിമാന്‍ഡ് ചെയ്തു.