കൊണ്ടോട്ടി: കേരളത്തില്‍ നിന്ന് ഹജ്ജ് തീര്‍ഥാടനത്തിന് പോകാനായി നേരിട്ട് അവസരം ലഭിച്ചവരുടെ ലിസ്റ്റ് ഇന്ന് സംസ്ഥാന ഹജ്ജ് കമ്മിറ്റി പ്രസിദ്ധീകരിക്കും. കേരളത്തിന് 11,197 ഹജ്ജ് സീറ്റുകളാണ് ഈ വര്‍ഷം ലഭിച്ചത്. ഇതില്‍ 70 വയസിന് മുകളില്‍ പ്രായമുളള 1740 പേര്‍ക്കും തുടര്‍ച്ചയായ അഞ്ചാം വര്‍ഷക്കാരായ 9090 പേരും ഉള്‍പ്പെടെ 10,830 പേര്‍ക്ക് നറുക്കെടുപ്പ് കൂടാതെ അവസരം ലഭിക്കും. ഇവരുടെ ലിസ്റ്റാണ് ഇന്ന് പുറത്തിറക്കുക. തീര്‍ഥാടകരെ ട്രെയിനര്‍മാര്‍ നേരിട്ട് വിളിച്ചറിയിക്കും.
അവശേഷിക്കുന്ന 367 സീറ്റിലേക്ക് നറുക്കെടുപ്പിലൂടെ തീര്‍ഥാടകരെ കണ്ടെത്തും.നറുക്കെടുപ്പ് 19ന് കരിപ്പൂര്‍ ഹജ്ജ് ഹൗസില്‍ നടക്കും. 20ന് ആദ്യഘട്ട ക്ലാസുകള്‍ ആരംഭിക്കും. സംസ്ഥാന ഹജ്ജ് കമ്മിറ്റിക്ക് കീഴില്‍ ഈ വര്‍ഷം 95,236 അപേക്ഷകരാണുളളത്. ഇവരില്‍ 11,197 പേര്‍ക്ക് അവസരം ലഭിച്ചതോടെ 84,039 പേര്‍ കാത്തിരിപ്പ് പട്ടികയിലാവും. കേരളത്തിലും മറ്റു സംസ്ഥാനങ്ങളിലും സീറ്റുകളില്‍ ഒഴിവ് വന്നാല്‍ വെയ്റ്റിങ് ലിസ്റ്റിലെ മുന്‍ഗണന പ്രകാരം അവസരം നല്‍കും.