ബാംബോലി: സന്തോഷ് ട്രോഫി ഫുട്‌ബോള്‍ ഫൈനല്‍ റൗണ്ടില്‍ കേരളത്തിന് വിജയത്തുടക്കം. വാശിയേറിയ പോരാട്ടത്തില്‍ റെയില്‍വേസിനെ രണ്ടിനെതിരേ നാലു ഗോളിനാണ് കേരളം പരാജയപ്പെടുത്തിയത്. ജോബി ജസ്റ്റിന്‍ കേരളത്തിനായി ഹാട്രിക്ക് നേടിയപ്പോള്‍ റെയില്‍വേസിനായി മലയാളി താരം രാജേഷ് ഇരട്ട ഗോള്‍ നേടി. കേരളത്തിന്റെ ശേഷിച്ച ഗോള്‍ ക്യാപ്റ്റന്‍ ഉസ്മാന്റെ വകയായിരുന്നു.
2004ന് ശേഷം ആദ്യമായി കിരീടം നേടാനുറച്ചാണ് ഗോവന്‍ മണ്ണില്‍ കേരളം കളത്തിലിറങ്ങിയത്. എന്നാല്‍ കേരളത്തെ ഞെട്ടിച്ച് മത്സരത്തില്‍ ആദ്യം ഗോള്‍ നേടിയത് റെയില്‍വേസ് ആയിരുന്നു. 17ാം മിനുട്ടില്‍ മലയാളി താരം രാജേഷിന്റെ ഗോളിലൂടെയാണ് റെയില്‍വേസ് മുന്നിലെത്തിയത്. കേരളത്തിന്റെ പ്രതിരോധത്തിന്റെ പിഴവാണ് ഗോളിന് വഴിവച്ചത്. ഇതോടെ കേരളം സമ്മര്‍ദത്തിലായെങ്കിലും പതിയെ മത്സരത്തിലേക്ക് തിരിച്ചെത്തി.
21ാം മിനുട്ടില്‍ ജോബി കേരളത്തിന് സമനില ഗോള്‍ സമ്മാനിച്ചു. തകര്‍പ്പനൊരു ഹെഡ്ഡറിലൂടെയായിരുന്നു താരത്തിന്റെ ഗോള്‍. ആദ്യ പകുതിയുടെ അധിക സമയത്ത് ജോബി വീണ്ടും കേരളത്തിന് രക്ഷകനായി ഇത്തവണ ഫ്രീകിക്കിലൂടെയായിരുന്നു ഗോള്‍. ഇതോടെ കേരളം 2-1ന് മുന്നിലായി.
രണ്ടാം പകുതിയില്‍ കേരളം കൂടുതല്‍ ആക്രമിച്ച് കളിക്കുന്നതാണ് കണ്ടത്. എന്നാല്‍ പ്രതിരോധത്തിലെ പിഴവ് കേരളത്തിന് പലപ്പോഴും തിരിച്ചടിയായി. വരും മത്സരങ്ങളില്‍ കേരളം ഈ കോട്ടം നികത്തിയില്ലെങ്കില്‍ വമ്പന്‍ തോല്‍വി ഏറ്റുവാങ്ങേണ്ടി വരും. റെയില്‍വേസ് താരങ്ങള്‍ തുടര്‍ച്ചയായി ആക്രമിച്ച് കളിച്ചു കൊണ്ടിരിക്കേയാണ് കേരളം അപ്രതീക്ഷിത ഗോള്‍ നേടുന്നത്. നോബി തന്നെയായിരുന്നു സ്‌കോറര്‍. ഈ ഗോളോടെ താരം ഹാട്രിക്ക് തികയ്ക്കുകയും ചെയ്തു.
ഇതോടെ കേരളത്തിന് രണ്ട് ഗോളിന്റെ ലീഡ് ലഭിച്ചു. ഒട്ടും വൈകാതെ ക്യാപ്റ്റന്‍ ഉസ്മാന്റെ ഹെഡ്ഡറിലൂടെ കേരളം 4-1ന്റെ മുന്‍തൂക്കം നേടി. കേരളത്തിന്റെ മൂന്നു ഗോളും വന്നത് ഹെഡ്ഡറിലൂടെയാണ്. കളി തീരാന്‍ മിനുട്ടുകള്‍ ബാക്കി നില്‍ക്കെ രാജേഷിലൂടെ റെയില്‍വേസ് വീണ്ടും ഗോള്‍ നേടിയെങ്കിലും കേരളം ഏറെ മുന്നിലായിരുന്നു. ഫൈനല്‍ റൗണ്ടില്‍ റെയില്‍വേസിന്റെ തുടര്‍ച്ചയായ രണ്ടാം തോല്‍വിയാണിത്.
അതേസമയം കേരളം നാളെ നടക്കുന്ന മത്സരത്തില്‍ പഞ്ചാബിനെ നേരിടും. ഗ്രൂപ്പ് ബിയില്‍ പഞ്ചാബ്, മഹാരാഷ്ട്ര എന്നിവരാണുള്ളത്.