തൃപ്രയാര്‍: തൃപ്രയാറില്‍ എട്ടംഗ സംഘത്തിന്റെ ആക്രമണത്തില്‍ കണ്ണൂര്‍ സ്വദേശിയായ കെട്ടിടനിര്‍മാണ തൊഴിലാളിക്ക് പരുക്കേറ്റു. കണ്ണൂര്‍ കോളയാട് സ്വദേശി പൊന്നമ്പുള്ളി വീട്ടില്‍ ഷിബുവിനാണ് പരുക്കേറ്റത്. തൃപ്രയാറില്‍ പുതിയ കെട്ടിടത്തിന്റെ നിര്‍മാണ തൊഴിലാളിയായ ഷിബു വാടകവീട്ടിലേക്ക് വരുന്നതിനിടെ കഴിഞ്ഞ ദിവസം വൈകീട്ടാണ് ആക്രമിക്കപ്പെട്ടത്. പരുക്കേറ്റ ഇയാളെ തൃശൂര്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഷിബു വാടകയ്ക്ക് താമസിച്ചിരുന്ന വീടിന് സമീപത്തെ വീട്ടുടമയുമായി നേരത്തെ തര്‍ക്കം നടന്നിരുന്നു. വീട്ടുടമ നല്‍കിയ പരാതിയെ തുടര്‍ന്ന് രണ്ടാഴ്ചക്കകം വീട് ഒഴിഞ്ഞുകൊടുക്കാന്‍ ഷിബുവിന് വലപ്പാട് പൊലിസ് നിര്‍ദേശം നല്‍കിയിരുന്നതാണ്. ഇതേ തുടര്‍ന്ന് മറ്റൊരു വീട്ടിലേക്ക് താമസം മാറാനിരിക്കേയാണ് ഷിബു ആക്രമിക്കപ്പെട്ടത്. ഇയാളെ ആക്രമിച്ച സംഭവത്തില്‍ എട്ട് പേര്‍ക്കെതിരെ കേസെടുത്തതായി വലപ്പാട് എസ്.ഐ മഹേഷ്‌കുമാര്‍ കണ്ടമ്പേത്ത് പറഞ്ഞു.