ബെയ്ജിങ്: ദക്ഷിണ ചൈനയിലെ ജിയാങ്‌സു പ്രവിശ്യയിലുണ്ടായ ശക്തമായ ചുഴലിക്കാറ്റിലും കനത്ത മഴയിലും നൂറിലേറെ പേര്‍ മരിച്ചു. എണ്ണൂറിലേറെ പേര്‍ക്കു പരുക്കേറ്റിട്ടുണ്ട്. യാങ്‌ചെങ് നഗരത്തിലാണ് ദുരന്തമുണ്ടായത്.
നിരവധി വീടുകള്‍ തകര്‍ന്നിട്ടുണ്ട്. നഗരത്തില്‍ പലയിടത്തും കടകളും വീടുകളും ഒലിച്ചുപോയി. മഴയും കാറ്റും കുറച്ചുദിവസംകൂടി തുടരുമെന്നാണ് റിപ്പോര്‍ട്ടുകള്‍. കാറ്റിലും മഴയിലും വന്‍ നാശനഷ്ടമുണ്ടായതായി ഔദ്യോഗിക വാര്‍ത്താ ഏജന്‍സിയാണ് അറിയിച്ചത്.

മണിക്കൂറില്‍ 125 കിലോമീറ്റര്‍ വേഗതയിലാണ് കാറ്റടിച്ചത്. നഗരത്തിന്റെ വിവിധ ഭാഗങ്ങളില്‍ വാര്‍ത്താവിനിമയ ബന്ധങ്ങള്‍ തകരാറിലായിട്ടുണ്ട്. ദുരന്തത്തില്‍ പരുക്കേറ്റവര്‍ വിവിധ ആശുപത്രികളില്‍ ചികിത്സയിലാണ്. പലരുടെയും നില ഗുരുതരമാണെന്നും ഒട്ടേറെപേരെ കാണാതായിട്ടുണ്ടെന്നും റിപ്പോര്‍ട്ടുണ്ട്.

ഉന്നത സുരക്ഷാ ഉദ്യോഗസ്ഥരാണ് രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കുന്നത്. ചൈനയുടെ വിവിധ ഭാഗങ്ങളില്‍ കുറച്ചു ദിവസങ്ങളായി കനത്ത മഴയും കാറ്റും തുടരുകയാണ്.
വിവിധയിടങ്ങളില്‍ പ്രകൃതിക്ഷോഭം റിപ്പോര്‍ട്ട് ചെയ്യപ്പെട്ടിട്ടുണ്ട്.

ജൂണില്‍ ഇതുവരെയുണ്ടായ കനത്ത മഴയിലും കാറ്റിലും നാശനഷ്ടമുണ്ടായതിനെ തുടര്‍ന്ന് ഇതുവരെ 3,21,000 പേരെ മാറ്റിപ്പാര്‍പ്പിച്ചതായാണ് കണക്ക്.
കഴിഞ്ഞ അഞ്ചു ദിവസങ്ങളിലെ കനത്ത മഴയില്‍ പത്തോളം പ്രവിശ്യകളിലാണ് നാശനഷ്ടമുണ്ടായത്.