മീനങ്ങാടി: തെരുവ് നായകള്‍ പുള്ളിമാനെ കടിച്ചു കൊന്നു. ഇന്നലെ പുലര്‍ച്ചെ നാലരയോടെ മീനങ്ങാടി ജൂബിലി ജങ്ഷനില്‍ സ്വകാര്യവ്യക്തിയുടെ കൃഷിയിടത്തിലാണ് തെരുവ് നായകളുടെ ആക്രമണത്തില്‍ പുള്ളിമാന്‍ ചത്തത്. സമീപത്തെ വീട്ടുകാരന്‍ തങ്കച്ചന്‍ തെരുവ് നായകളുടെ ശബ്ദം കേട്ടെങ്കിലും ആക്രമണം ഭയന്നു പുറത്തിറങ്ങിയില്ല.
പിന്നീട് വനം വകുപ്പിനെ വിവരമറിയിക്കുകയുമായിരുന്നു. മേപ്പാടി റെയ്ഞ്ചില്‍ മുട്ടില്‍ സെക്ഷനിലെ ബീറ്റ് ഫോറസ്റ്റ് ഓഫിസര്‍ സന്തോഷിന്റെ നേതൃത്വത്തില്‍ വാച്ചര്‍മാരായ ബാബുരാജ്, പൈതല്‍ എന്നിവര്‍ ചേര്‍ന്ന് നടപടികള്‍ക്ക് ശേഷം പുള്ളിമാന്റെ ജഡം കുഴിച്ചിട്ടു. കാരാപ്പുഴ ഡാം സൈറ്റില്‍ ഇത്തരം പുള്ളിമാനുകളുണ്ടെന്നും ഇവയില്‍ കൂട്ടം തെറ്റി വന്ന മാനാകാം തെരുവ് നായകളുടെ പിടിയില്‍ പെട്ടതെന്ന് ബീറ്റ് ഫോറസ്റ്റര്‍ സന്തോഷ് പറഞ്ഞു.