കോഴിക്കോട്: വിശുദ്ധ റമദാനിന്റെ വരവറിയിച്ച് കോഴിക്കോട് നഗരത്തില്‍ ഈത്തപ്പഴ മേളകള്‍ക്ക് തുടക്കമായി. ഇന്‍ഡോര്‍ സ്റ്റേഡിയത്തില്‍ 'കോഴിക്കോടന്‍സ് ' സംഘടിപ്പിക്കുന്ന ഏഴാമത് ഈത്തപ്പഴ മേളയില്‍ വിവിധ രാജ്യങ്ങളില്‍ നിന്നുള്ള അപൂര്‍വയിനം ഈത്തപ്പഴങ്ങളുടെ പ്രദര്‍ശനവും വിപണനവുമാണ് ഒരുക്കിയിരിക്കുന്നത്. ഈത്തപ്പഴങ്ങളുടെ മഹാരാജാവായ മെഡ്‌ജോള്‍-ജോര്‍ദാനും വിശുദ്ധ ഈത്തപ്പഴമെന്ന് അറിയപ്പെടുന്ന അല്‍-അജ്‌വയുമാണ് പ്രധാന ആകര്‍ഷണം.
കൂടാതെ സഊദി, ജോര്‍ദാന്‍, ഇറാന്‍, ഈജിപ്ത്, ഒമാന്‍, യു.എ.ഇ, നൈജീരിയ, തുനീസ്യ, ഇറാഖ്, എന്നിവിടങ്ങളിലെ ഇരുപത്തിരണ്ടോളം വ്യത്യസ്തയിനം ഈത്തപ്പഴങ്ങളും, അച്ചാര്‍, പായസം, ഹല്‍വ, ബിസ്‌കറ്റ്, കേക്ക് എന്നിങ്ങനെ കൊതിയൂറുന്ന ഈത്തപ്പഴ വിഭവങ്ങളും പ്രദര്‍ശനത്തിലുണ്ട്. ഇവയ്ക്ക് 50 രൂപ മുതല്‍ 6000 രൂപ വരെ വിലവരും. തേനും കുങ്കുമവും ചേര്‍ത്ത് തയാറാക്കുന്ന സൗദി സ്‌പെഷല്‍ അല്‍-അജ്‌വയ്ക്ക് 6000 രൂപയാണ് വില.
മേളയില്‍ നിന്നുള്ള ലാഭവിഹിതം മെഡിക്കല്‍ കോളേജിലെ സാന്ത്വന ചികിത്സാ കേന്ദ്രത്തിനു നല്‍കും. കലക്ടര്‍ യു.വി ജോസ് മേള ഉദ്ഘാടനം ചെയ്തു.
പെയ്ന്‍ ആന്‍ഡ് പാലിയേറ്റിവ് മെഡിസിന്‍ ഡയറക്ടര്‍ ഡോ. സുരേഷ്‌കുമാര്‍, മുന്‍ സംസ്ഥാന ന്യൂനപക്ഷ കമ്മിഷന്‍ ചെയര്‍മാന്‍ അഡ്വ. എം. വീരാന്‍കുട്ടി സംബന്ധിച്ചു. മേള ഈ മാസം 24ന് സമാപിക്കും.സഊദി ആസ്ഥാനമായി പ്രവര്‍ത്തിക്കുന്ന ഡേ ഫ്രഷിന്റെ നേതൃത്വത്തില്‍ മാവൂര്‍ റോഡിലെ ഫ്രൂട്രീയില്‍ ഈത്തപ്പഴ മേള തുടങ്ങി. നാല്‍പ്പതോളം ഇനം ഈത്തപ്പഴങ്ങളാണ് ഇവിടെ പ്രദര്‍ശനത്തിനും വില്‍പനയ്ക്കുമായുള്ളത്.
സഊദി, ജോര്‍ദാന്‍, ഇറാന്‍, ഒമാന്‍, തുനീസ്യ, ഇറാഖ്, അല്‍ജീരിയ തുടങ്ങിയ പത്തോളം രാജ്യങ്ങളിലെ അപൂര്‍വയിനം ഈത്തപ്പഴങ്ങള്‍ വില്‍പനയ്ക്കുണ്ട്. മദീനയിലെ തോട്ടങ്ങളില്‍ വിളയുന്ന അജ്‌വയാണ് മേളയിലെ പ്രധാന ആകര്‍ഷണം. മേളയിലെ ഏറ്റവും വിലയേറിയ ഈത്തപ്പഴവും അജ്‌വ തന്നെ. കിലോയ്ക്ക് 1800 രൂപയാണ് വില.
ജോര്‍ദാനില്‍ നിന്നുള്ള മെഡ്‌ജോളിനും ആവശ്യക്കാരേറെയാണ്. കിലോയ്ക്ക് 1400 രൂപയാണ് വില. മലയാളികളുടെ പ്രിയ ഇനമായ ഫര്‍ദ്, ഖനേസി വിഭാഗത്തില്‍പ്പെട്ട ഈത്തപ്പഴവും മേളയിലുണ്ട്. രാവിലെ 11 മുതല്‍ രാത്രി 12 വരെയാണ് മേള. ഈ മാസം 20ന് സമാപിക്കും.