തിരുവനന്തപുരം: സംസ്ഥാനത്ത് സ്വകാര്യ മേഖലയില്‍ ജോലി ചെയ്യുന്ന നഴ്‌സുമാര്‍ക്ക് മിനിമം വേതനം പോലും നടപ്പിലാക്കാത്ത സര്‍ക്കാര്‍ നടപടിയില്‍ പ്രതിഷേധിച്ച് സെക്രട്ടേറിയറ്റ് മാര്‍ച്ചും ധര്‍ണയും സംഘടിപ്പിക്കുമെന്ന് ഇന്ത്യന്‍ നഴ്‌സസ് അസോസിയേഷന്‍ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. നാളെ രാവിലെ 11ന് തൊഴില്‍ ഭവനില്‍ നിന്ന് സെക്രട്ടേറിയറ്റിലേക്ക് നടത്തുന്ന പ്രതിഷേധ മാര്‍ച്ചില്‍ ആയിരക്കണക്കിന് നഴ്‌സുമാരും അവരുടെ രക്ഷിതാക്കളും പങ്കെടുക്കും.
സ്വകാര്യ നഴ്‌സിങ് മേഖലയിലെ ചൂഷണങ്ങള്‍ സംബന്ധിച്ചു പഠിച്ച സമിതിയുടെ നിര്‍ദേശങ്ങള്‍ നടപ്പിലാക്കാന്‍ കേന്ദ്രസര്‍ക്കാര്‍ സംസ്ഥാനത്തോട് നിഷ്‌കര്‍ഷിച്ചിരുന്നു. ചൂഷണം തടയാന്‍ സ്വീകരിച്ച നടപടികള്‍ സംബന്ധിച്ച് 2016 ഒക്ടോബര്‍ 20നകം റിപ്പോര്‍ട്ട് ചെയ്യണമെന്നും കേന്ദ്രം ആവശ്യപ്പെട്ടു. എന്നാല്‍ സംസ്ഥാന സര്‍ക്കാരും തൊഴില്‍ വകുപ്പും ഇത് അട്ടിമറിച്ചു.
മിനിമം വേതന സമിതിയുടെ തുച്ഛമായ ശമ്പള നിര്‍ദേശവുമായി മുന്നോട്ടുപോവുകയായിരുന്നു സംസ്ഥാന സര്‍ക്കാര്‍. ഇതിനാലാണ് സമരവുമായി മുന്നോട്ടുപോകുന്നതെന്നും ഭാരവാഹികളായ വിനീത് കൃഷ്ണന്‍, ലിബിന്‍ തോമസ്, എസ്.എസ് അശ്വതി എന്നിവര്‍ വാര്‍ത്താസമ്മേളനത്തില്‍ പറഞ്ഞു.