കരുനാഗപ്പള്ളി: നാട്ടുകാരെ അക്രമിച്ചു രക്ഷപ്പെട്ട കുപ്രസിദ്ധ ഗുണ്ടതലവന്‍ ഷിബു കഞ്ചാവുമായി അറസ്റ്റില്‍. കൃഷ്ണപുരം ഞക്കനാല്‍ സ്വദേശിയായ ഷിബുവിനെയാണ് രണ്ട് കിലോ കഞ്ചാവുമായി എക്‌സൈസ് സംഘം അറസ്റ്റ് ചെയ്യ്തത്. എക്‌സൈസ് റെയ്ഞ്ച് ഇന്‍സ്‌പെക്ടര്‍ എ. ജോസ് പ്രതാപിന് കിട്ടിയ രഹസ്യവിവരത്തിന്റെ അടിസ്ഥാനത്തില്‍ ഷാഡോ ടീമംഗങ്ങളായ വിജു, എസ്. ശ്യാംകുമാര്‍, സജീവ്കുമാര്‍ എന്നിവരുടെ നേതൃത്വത്തില്‍ ചങ്ങന്‍കുളങ്ങര-വള്ളികുന്നം റോഡില്‍ പോംസി കമ്പനിക്കടുത്തുള്ള റെയില്‍വേ ഗേറ്റിനു സമീപം ഇയാളെ പിടികൂടിയത്.
കഞ്ചാവ് ആവശ്യക്കാരനെന്ന വ്യാജേനയാണ് ഷിബുവിനെ ഇന്നലെ ഉച്ചയോടെ പിടികൂടിയത്. മൂന്ന് ദിവസം മുമ്പ് ഷിബു കഞ്ചാവുമായി ഓട്ടോറിക്ഷയില്‍ വരുന്ന വിവരം നാട്ടുകാര്‍ എക്‌സൈസിനെ വിളിച്ച് അറിയിച്ചിരുന്നു.
എക്‌സൈസ് സംഘം സ്ഥലത്ത് എത്തുന്നതിന് മുന്‍പ് ഇയാള്‍ വന്ന ഓട്ടോറിക്ഷ നാട്ടുകാര്‍ തടയാന്‍ ശ്രമിക്കുന്നതിനിടെ ഷിബുവും കുട്ടാളികളും കുടി നാട്ടുകാരെ അക്രമിച്ച ശേഷം രക്ഷപ്പെടുകയായിരുന്നു. പ്രതിയെ ചോദ്യം ചെയ്തതില്‍ ഇയാള്‍ ദിണ്ടിഗലില്‍ നിന്നും സ്ഥിരമായി കഞ്ചാവ് വലിയ തോതില്‍ കൊണ്ടുവന്ന് ആലപ്പുഴ,കൊല്ലം ജില്ലകളിലെ വിവിധ പ്രദേശങ്ങളില്‍ ചെറുകിട കച്ചവടക്കാര്‍ക്ക് നല്‍കുകയാണ് പതിവെന്ന് മനസിലായി.