തിരുവനന്തപുരം: സംസ്ഥാനത്തിനകത്തെ ചരക്കുനീക്കത്തിന് ഈ-വേബില്‍ നിബന്ധനകളില്‍ വ്യക്തത വരുത്തി സംസ്ഥാന ചരക്ക് സേവന നികുതി വകുപ്പ് ഉത്തരവിറക്കി.
ഇതനുസരിച്ച് സംസ്ഥാനത്തിനകത്ത് സ്വന്തം ആവശ്യത്തിന് അംഗീകൃത വ്യാപാരിയില്‍നിന്ന് വാങ്ങുന്ന ചരക്കുകള്‍ 25 കിലോമീറ്റര്‍ പരിധിയില്‍ നടത്തുന്ന ചരക്കുനീക്കത്തിന് ഈ-വേബില്‍ ആവശ്യമില്ല. ഇതിന് ജി.എസ്.ടി നിയമം വകുപ്പ് 31 പ്രകാരം വ്യാപാരി നല്‍കുന്ന ഇന്‍വോയ്‌സ് മാത്രം മതിയാകും.എന്നാല്‍, കച്ചവട ആവശ്യത്തിനുള്ള ചരക്കുനീക്കത്തിന് ഇളവ് ബാധകമല്ല. കൂടാതെ 50,000 രൂപയില്‍ അധികം മൂല്യമുള്ള ചരക്ക് നീക്കമാണെങ്കില്‍ സ്വന്തം ആവശ്യത്തിനാണെങ്കിലും ഇ-വേബില്‍ നിര്‍ബന്ധമാണ്.
സംസ്ഥാനത്തിനകത്തെ കര്‍ഷകരില്‍നിന്ന് നേരിട്ടുവാങ്ങുന്ന റബര്‍ ലാറ്റക്‌സ്, റബര്‍ ഷീറ്റ്, റബര്‍ സ്‌ക്രാപ്, സുഗന്ധവ്യഞ്ജനങ്ങള്‍ എന്നിവയും ഇ-വേബില്‍ പരിധിയില്‍നിന്ന് ഒഴിവാക്കിയിട്ടുണ്ട്. ഇതിന് കേരള ജി.എസ്.ടി റൂള്‍ 2017 ലെ റൂള്‍ 55 പ്രകാരമുള്ള ഡെലിവറി ചെലാനോ, കേരള ജി.എസ്.ടി നിയമപ്രകാരമുള്ള ഇന്‍വോയിസോ ഉപയോഗിക്കാം.
സംസ്ഥാനത്തിനകത്ത് വാന്‍ സെയില്‍സ് നടത്തുന്ന രജിസ്‌ട്രേഡ് വ്യാപാരികളെയും ഇ-വേബില്ലിന്റെ പരിധിയില്‍നിന്ന് ഒഴിവാക്കിയിട്ടുണ്ട്.
ഇവര്‍ വാന്‍ സെയില്‍സ് നടത്തുമ്പോള്‍ സംസ്ഥാന ജി.എസ്.ടി റൂള്‍ 56 (18) പ്രകാരമുള്ള രേഖകള്‍ വാനില്‍ സൂക്ഷിക്കണം. കൂടുതല്‍ വിവരങ്ങള്‍ സംസ്ഥാന ചരക്ക് സേവന നികുതി വകുപ്പിന്റെ സര്‍ക്കുലര്‍ നമ്പര്‍ 32018 ല്‍ ലഭ്യമാണ്.