മലപ്പുറം: രാജ്യത്ത് സമാധാനം സൃഷ്ടിക്കുന്നതില്‍ ഉന്നത വിദ്യാഭ്യാസ രംഗത്തെ അധ്യാപകരുള്‍പ്പെടെയുള്ളവരുടെ പങ്ക് നിസ്തുലമെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍. കോണ്‍ഫെഡറേഷന്‍ ഓഫ് കേരള കോളജ് ടീച്ചേഴ്‌സ് (സി.കെ.സി.ടി)സംസ്ഥാനസമ്മേളനം മലപ്പുറത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജ്യത്തിന്റെ ഭാവി തലമുറക്ക്് മതേതര മൂല്യങ്ങള്‍ പകര്‍ന്നുനല്‍കുന്നവരാണ് അധ്യാപകര്‍. കലാലയങ്ങളില്‍ വിദ്യാര്‍ഥികളെ വഴി തെറ്റിക്കുന്നതിനുള്ള നീക്കങ്ങള്‍ വര്‍ധിച്ചുവരികയാണെന്നും അധ്യാപകര്‍ ഇതു തിരിച്ചറിഞ്ഞ് പ്രവര്‍ത്തിക്കണമെന്നും തങ്ങള്‍ പറഞ്ഞു. വിവിധ മേഖലകളില്‍ മികവുതെളിയിച്ച പ്രമുഖരെ ചടങ്ങില്‍ ഹൈദരലി ശിഹാബ് തങ്ങള്‍ ആദരിച്ചു. പാണക്കാട് സയ്യിദ് ബഷീറലി ശിഹാബ് തങ്ങള്‍ (മികച്ച വിദ്യാഭ്യാസ പ്രവര്‍ത്തകന്‍), കെ.എന്‍.എ ഖാദര്‍(രാഷ്ട്രീയം), കാരാടന്‍ സുലൈമാന്‍(സംരംഭകന്‍), ഈസ മുഹമ്മദ്(ജീവകാരുണ്യം), ഡോ. സ്വാമിനാഥന്‍( ആതുര സേവനം), കെ. പ്രതീഷ്(ട്രോമാകെയര്‍), മൂസ സ്വലാഹി(മികച്ച അധ്യാപകന്‍) എന്നിവരെയാണ് ആദരിച്ചത്. സംസ്ഥാന പ്രസിഡന്റ് പ്രൊഫ. പാമ്പള്ളി മഹ്മൂദ് അധ്യക്ഷനായി. എം.എല്‍.എമാരായ പ്രൊഫ. ആബിദ് ഹുസൈന്‍ തങ്ങള്‍, പി. ഉബൈദുള്ള, മുസ്്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്, അഡ്വ.യു. എ ലത്തീഫ്, പ്രൊഫ. പി. എം സലാഹുദ്ദീന്‍, ശരീഫ് വടക്കയില്‍, സി.കെ.സി.ടി സംസ്ഥാന ജനറല്‍ സെക്രട്ടറി ഡോ. സൈനുല്‍ ആബിദ് കോട്ട, പ്രൊഫ. ഷഹദ് ബിന്‍ അലി സംസാരിച്ചു.