കരുനാഗപ്പള്ളി: ദേശീയ പാതയോരങ്ങളില്‍ കടപുഴകി വീണ മരങ്ങള്‍ റോഡരികില്‍ തന്നെ മുറിച്ചിട്ടത് അപകടഭീഷണിയാകുന്നു.
മഴക്കാലത്ത് കടപുഴകി വീണ കൂറ്റന്‍ തണല്‍മരങ്ങള്‍ ആണ് ഇത്തരത്തില്‍ റോഡരികില്‍ മുറിച്ചിട്ടിരിക്കുന്നത്. പുത്തന്‍ തെരുവ് സലഫി ജുമുഅ മസ്ജിദിന് സമീപം, ലാലാജി ജങ്ഷനിലുമാണ് ഇത്തരത്തില്‍ മരങ്ങള്‍ അശ്രദ്ധയോടെ മുറിച്ചിട്ടിരിക്കുന്നത്.
കാല്‍നടയാത്രക്കാരും ഇരുചക്ര വാഹന യാത്രികരുമാണ് ഇതു കാരണം അപകടഭീഷണിയിലായത്. മരങ്ങള്‍ കിടക്കുന്നതിനാല്‍ വലിയ വാഹനങ്ങള്‍ വരുമ്പോള്‍ ഇരുചക്രവാഹനങ്ങള്‍ക്ക് സൈഡ് കൊടുക്കാന്‍പോലും പറ്റാത്ത സ്ഥിതിയാണ്. അധികൃതര്‍ ഉടന്‍ നടപടിയെടുക്കണമെന്ന ആവശ്യം ശക്തമാണ്.