പുല്‍പ്പള്ളി: കൃപാലയ സ്‌പെഷ്യല്‍ സ്‌കൂളില്‍ ഭാരത് സ്‌കൗട്ട് ആന്‍ഡ് ഗൈഡ്‌സ് ബത്തേരി ഉപജില്ലയുടെ നേതൃത്വത്തില്‍ ഏകദിന സംയോജിത പഠന ക്യാംപ് നടത്തി. കൃപാലയ സ്‌പെഷ്യല്‍ സ്‌കൂളിലെ മുപ്പതോളം കുട്ടികളും നിര്‍മല കബനിഗിരി, ജയശ്രീ കല്ലുവയല്‍, വിജയ പുല്‍പ്പള്ളി എന്നീ സ്‌കൂളുകളില്‍നിന്ന് നാല്‍പതോളം സ്‌കൗട്ട് ആന്‍ഡ് ഗൈഡ് വിദ്യാര്‍ഥികളും ക്യാംപില്‍ പങ്കെടുത്തു. ഭിന്നശേഷിക്കാരായ സ്‌കൗട്ട് ആന്‍ഡ് ഗൈഡ്‌സ് കുട്ടികളോടൊപ്പം നോര്‍മല്‍ സ്‌കൂളിലെ സ്‌കൗട്ട് ആന്‍ഡ് ഗൈഡ് വിദ്യാര്‍ഥികളെ പങ്കെടുപ്പിച്ച് കൊണ്ടുള്ള സംസ്ഥാനത്തെ ആദ്യ ക്യാംപാണ് കൃപാലയില്‍ നടത്തിയത്. ഭിന്നശേഷിക്കാരായ കുട്ടികളെ സമൂഹത്തിന്റെ മുഖ്യധാരയിലേക്ക് കൊണ്ടുവരുന്നതിന്റെ ഭാഗമായിട്ടാണ് സംയോജിത പഠന ക്യാംപ് നടത്തിയത്. ഇതിലൂടെ മറ്റ് കുട്ടികളില്‍നിന്നും തങ്ങള്‍ ഒട്ടുംപിന്നിലല്ല എന്ന അവബോധം അവരില്‍ സൃഷ്ടിക്കാന്‍ സാധിച്ചു. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി പരിപാടി ഉദ്ഘാടനം ചെയ്തു. സ്‌കൂള്‍ പ്രന്‍സിപ്പല്‍ സിസ്റ്റര്‍ ആന്‍സ് മരിയ അധ്യക്ഷയായി. ഭാരത് സ്‌കൗട്ട്‌സ് ആന്‍ഡ് ഗൈഡ്‌സ് ജില്ലാ പ്രസിഡന്റ് ജോസ് പുന്നക്കുഴി മുഖ്യപ്രഭാഷണം നടത്തി. ജില്ലാപഞ്ചായത്തംഗം ഒ.ആര്‍ രഘു, സ്‌കൗട്ട് മാസ്റ്റര്‍മാരായ പി.എന്‍ രാജന്‍, എ.സി ഉണ്ണികൃഷ്ണന്‍, എം.കെ ശ്രീനിവാസന്‍, ടി.പി സ്റ്റീഫന്‍, ഷിജു, മറിയാമ, ബെറ്റി ജോണ്‍, ലൂസി ജോസഫ് സംസാരിച്ചു.