മലപ്പുറം: സ്‌നേഹ സന്ദേശവുമായി പാണക്കാട് സയ്യിദ് മുനവ്വറലി ശിഹാബ് തങ്ങള്‍ മലപ്പുറം സെന്റ് ജോസഫ് ദേവാലയത്തിലെത്തി. വര്‍ഷാവര്‍ഷം ഇവിടെ നടക്കാറുള്ള യൗസേപ്പ് പിതാവിന്റെ ഊട്ടു തിരുന്നാള്‍ നേര്‍ച്ചയില്‍ പങ്കെടുക്കാനാണ് തങ്ങള്‍ ദേവാലയത്തിലെത്തിയത്. ഫാദര്‍ സെബാസ്റ്റ്യന്‍ കാരക്കാട്ട്, ഫാദര്‍ റംലത്ത് തോമസ്, ഫാ. എസ്.ജെ ഫിലിപ്പ് , ഫാ. മാത്യു കണ്ടശ്ശാംകുന്നില്‍, സിസ്റ്റര്‍ ഡെയ്‌സി കുര്യന്‍, സിസ്റ്റര്‍ ലൂസിന, പാരിസ് കൗണ്‍സില്‍ സെക്രട്ടറി ജോളി അഗസ്റ്റിന്‍, ഡാനി ഫ്രാന്‍സിസ് തുടങ്ങിയവര്‍ ചേര്‍ന്ന് സയ്യിദ് മുനവ്വറലി തങ്ങളെ സ്വീകരിച്ചു.
എല്ലാ വര്‍ഷവും ഇവിടെ നടക്കുന്ന ചടങ്ങില്‍ പണക്കാട് കുടുംബാംഗങ്ങള്‍ എത്താറുണ്ട്. കഴിഞ്ഞ വര്‍ഷം മുനവ്വറലി തങ്ങള്‍ക്കൊപ്പം ഊട്ടു തിരുനാളില്‍ ഇ. അഹമ്മദ് എം.പിയും പങ്കെടുത്തിരുന്നു.  ഊട്ടു തിരുനാളിന്റെ ഭാഗമായി നടന്ന വിരുന്നില്‍ പങ്കെടുത്ത തങ്ങള്‍ ഫാദര്‍ ടോം ഉഴുന്നാലിന്റെ മോചനത്തിന് കേന്ദ്രസര്‍ക്കാറിന് സമര്‍പ്പിക്കാനുള്ള കേരള കത്തോലിക് യൂത്ത് വിങിന്റെ ഒപ്പു ശേഖരണത്തിലെ ആദ്യ ഒപ്പുകാരനുമായി. നഗരസഭാ കൗണ്‍സിലര്‍ ഹാരിസ് ആമിയന്‍, പി.കെ ബാവ, സമീര്‍ വാളന്‍, കെ.കെ ഹക്കീം, അഷ്‌റഫ് പാറച്ചോടന്‍, ഷെബീര്‍ കോട്ടക്കുന്ന് തുടങ്ങിയവര്‍ തങ്ങള്‍ക്കൊപ്പം ദേവാലയത്തിലെത്തി.