തിരുവനന്തപുരം: ചെറിയ തുകയ്ക്കുള്ള മുദ്രപത്രങ്ങളുടെ ക്ഷാമം ഇല്ലാതാക്കാന്‍ അടിയന്തര നടപടി സ്വീകരിക്കണമെന്നു സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ജെ.ബി കോശി ചീഫ് സെക്രട്ടറിക്കു നിര്‍ദേശം നല്‍കി.
20, 50, 100 രൂപ വിലയുള്ള മുദ്രപത്രങ്ങള്‍ കിട്ടാത്തതു കാരണം ജനന, മരണ സര്‍ട്ടിഫിക്കറ്റുകള്‍ ലഭിക്കാന്‍ 500 രൂപയുടെ മുദ്രപത്രങ്ങള്‍ വാങ്ങേണ്ടിവരുന്നെന്നാണ് പരാതി. ജനന, മരണ സര്‍ട്ടിഫിക്കറ്റുകള്‍ക്ക് 20 രൂപയുടെ മുദ്രപത്രം മതിയാകും. വാടക കരാറുകള്‍ക്ക് 200 രൂപ മതിയാകും.
കരാറെഴുതാനുള്ള മുദ്രപത്രങ്ങളുടെ കുറഞ്ഞവില 500 രൂപയാക്കി 2015ല്‍ ധനവകുപ്പ് ഉത്തരവിറക്കിയിരുന്നു. പ്രതിഷേധം ശക്തമായതോടെ അത് 200 രൂപയാക്കി കുറച്ചു. എന്നാല്‍, 200 രൂപയുടെ മുദ്രപത്രങ്ങള്‍ക്കു കൃത്രിമ ക്ഷാമമുണ്ടാക്കി 500 രൂപയുടെ മുദ്രപത്രങ്ങള്‍ വില്‍ക്കുകയാണ് ചെയ്യുന്നതെന്നു പൊതുപ്രവര്‍ത്തകനായ പി.കെ രാജു സമര്‍പ്പിച്ച പരാതിയില്‍ പറയുന്നു.