ജറുസലേം: കിഴക്കന്‍ ജറുസലേമിലെ അല്‍അഖ്‌സ പള്ളിയില്‍ ഇസ്‌റാഈല്‍ പൊലിസ് അതിക്രമം. സംഘര്‍ഷത്തില്‍ നിരവധി വിശ്വാസികള്‍ക്ക് പരുക്കേറ്റു. റമദാനില്‍ പള്ളിയില്‍ ജൂതര്‍ക്കും സന്ദര്‍ശനം അനുവദിച്ചതാണ് സംഘര്‍ഷത്തിനു ഇടയാക്കിയതെന്നാണ് ആദ്യ റിപ്പോര്‍ട്ടുകള്‍. ഏഴ് ഫലസ്തീന്‍ പൗരന്മാര്‍ക്ക് പരുക്കേറ്റതായും ഇവരെ ആശുപത്രിയില്‍ പ്രവേശിപ്പിച്ചുവെന്നും ഫലസ്തീന്‍ റെഡ്്ക്രസന്റ് അധികൃതര്‍ പറഞ്ഞു. മെഡിക്കല്‍ സംഘം പ്രദേശത്തെത്തിയാണ് ഇവരെ ആശുപത്രിയിലെത്തിച്ചത്. കിഴക്കന്‍ ജറുസലേം പള്ളിയിലാണ് പരുക്കേറ്റവരുള്ളത്. ഇവര്‍ക്ക് പൊലിസിന്റെ വെടിയേറ്റാണ് പരുക്ക്. പള്ളിക്ക് പുറത്ത് പൊലിസ് കണ്ണീര്‍വാതകവും പ്രയോഗിച്ചു. ഷെല്ലുകള്‍ പൊട്ടിത്തെറിച്ചും പലര്‍ക്കും പരുക്കേറ്റു. നാലു പേരെ അറസ്റ്റ് ചെയ്തതായി ഇസ്്‌റാഈല്‍ പൊലിസ് പറഞ്ഞു. മുഖംമൂടിയെത്തിയ യുവാക്കള്‍ പള്ളിയില്‍ സന്ദര്‍ശനത്തിനെത്തിയ മുസ്്‌ലിംകളല്ലാത്തവരെ തടയുകായിരുന്നുവെന്നാണ് പൊലിസ് വിശദീകരണം.
അഖ്്‌സപള്ളിയില്‍ മുസ്്‌ലിംകള്‍ക്കും ജൂതര്‍ക്കും സന്ദര്‍ശനത്തിന് അനുമതിയുണ്ടെങ്കിലും ഇരുവിഭാഗത്തിനും പ്രാര്‍ഥനാ സൗകര്യം അനുവദിക്കുന്നില്ല. മുസ്്‌ലിംകളുടെ ലോകത്തെ മൂന്നാമത്തെ വിശുദ്ധഗേഹമാണ് അഖ്്‌സപള്ളി.