മണ്ണാര്‍ക്കാട്: മുളങ്കൂട്ടം റോഡിലേക്ക് കടപുഴകി വീണു. അട്ടപ്പാടി റോഡില്‍ ഗതാഗതം പൂര്‍ണമായും തടസപ്പെട്ടു. മുക്കാലി ചുരത്തില്‍ ആനമൂളിക്ക് സമീപമാണ് മുളങ്കൂട്ടം കടപുഴകി വീണത്. ശനിയാഴ്ച പുലര്‍ച്ചെ രണ്ടു മണിയോടെയാണ് സംഭവം. ഇതോടെ മണ്ണാര്‍ക്കാട് - അട്ടപ്പാടി - ചിന്നതടാകം റോഡില്‍ ഗതാഗതം പൂര്‍ണമായും സ്തംഭിച്ചു. വിവരമറിഞ്ഞ് വട്ടമ്പലത്തുനിന്ന് ഫയര്‍ ഫോഴ്‌സ് എത്തിയെങ്കിലും മുളങ്കൂട്ടത്തെ മാറ്റാന്‍ കഴിഞ്ഞില്ല. തുടര്‍ന്ന് ഞായറാഴ്ച രാവിലെ എട്ടു മണിയോടെ ജെ.സി.ബി എത്തിയാണ് മുളങ്കൂട്ടത്തെ മാറ്റാന്‍ തുടങ്ങിയത്. രാവിലെ ഒന്‍പതു മണിയോടെയാണ് ഗതാഗതം പൂര്‍ണമായും പുനഃസ്ഥാപിച്ചത്. അര്‍ധരാത്രിയില്‍ ചുരത്തിലുണ്ടായ ശക്തമായ കാറ്റാണ് ഉണങ്ങിയ മുളങ്കൂട്ടം നിലംപതിക്കാന്‍ കാരണമായി കരുതുന്നത്.