കണ്ണൂര്‍: ഞങ്ങളെ ഉദ്ഘാടന വെറിയൊന്നും പിടികൂടിയിട്ടില്ലെന്ന് മുഖ്യമന്ത്രി പിണറായി വിജയന്‍. രണ്ടുവര്‍ഷത്തിനിടെ മുഖ്യമന്ത്രി ഒരുപദ്ധതിക്കു പോലും തറക്കല്ലിട്ടില്ലെന്ന പ്രതിപക്ഷ നേതാവ് രമേശ് ചെന്നിത്തലയുടെ പ്രസ്താവനയ്ക്കു മറുപടി പറയുകയായിരുന്നു അദ്ദേഹം.
സര്‍ക്കാരിന്റെ രണ്ടാംവാര്‍ഷികാഘോഷത്തിന്റെ ഭാഗമായി യു.ഡി.എഫ് നടത്തിയ വഞ്ചനാ ദിനാചരണത്തോടനുബന്ധിച്ചായിരുന്നു ചെന്നിത്തലയുടെ പരാമര്‍ശം. എല്ലാചോദ്യത്തിനും മറുപടി പറയുന്നില്ലെന്നും നായനാര്‍ അക്കാദമി മ്യൂസിയം കെട്ടിടം ഉദ്ഘാടനം ചെയ്തു സംസാരിക്കവേ മുഖ്യമന്ത്രി വ്യക്തമാക്കി.
തറക്കല്ലിടാന്‍ വലിയ താല്‍പര്യം യു.ഡി.എഫ് സര്‍ക്കാരിനും അവരുടെ മുഖ്യമന്ത്രിക്കുമായിരുന്നു. കൊച്ചി മെട്രോ ഉദ്ഘാടനം നടത്തിയതും നമ്മളെല്ലാം കണ്ടതാണ്. എന്നാല്‍ ഇടതുസര്‍ക്കാര്‍ വന്നതിനു ശേഷമാണ് ആളുകള്‍ സഞ്ചരിച്ചുള്ള മെട്രോയുടെ ഉദ്ഘാടനം നടത്തിയത്.
കണ്ണൂര്‍ വിമാനത്താവള ഉദ്ഘാടനവും എത്ര പരിഹാസ്യമായിരുന്നു. വായുസേനയുടെ എവിടെയും ഇറക്കാവുന്ന വിമാനമാണു അന്ന് ഇറക്കിയത്. ഇത്തരം വിദ്യയൊന്നും കാണിച്ച് ആളുകളെ പറ്റിക്കുന്ന രീതി ഇടതുസര്‍ക്കാരിനില്ലെന്നും മുഖ്യമന്ത്രി പറഞ്ഞു.