ഇരവിപുരം: തന്റെ ശുപാര്‍ശപ്രകാരം ഇരവിപുരം മണ്ഡലത്തിലെ 151 പേര്‍ക്ക് മുഖ്യമന്ത്രിയുടെ ദുരിതാശ്വാസ നിധിയില്‍നിന്നും 28 .98 ലക്ഷം രൂപയുടെ ചികിത്സ ആശ്വാസ ധനസഹായം അനുവദിച്ചതായി എം. നൗഷാദ് എം.എല്‍.എ പ്രസ്താവനയില്‍ അറിയിച്ചു. വടക്കേവിള വില്ലേജിലെ 30 പേര്‍ക്കായി 6.09 ലക്ഷം രൂപയും മുണ്ടക്കല്‍ വില്ലേജിലെ 28 പേര്‍ക്കായി 5.83 ലക്ഷം രൂപയും മയ്യനാട് വില്ലേജിലെ 28 പേര്‍ക്കായി 5.02 ലക്ഷം രൂപയും കിളികൊല്ലൂര്‍ വില്ലേജിലെ 25 പേര്‍ക്കായി 4 .82 ലക്ഷം രൂപയും ഇരവിപുരം വില്ലേജിലെ 40 പേര്‍ക്കായി 7.22 ലക്ഷം രൂപയുമാണ് അനുവദിച്ചിട്ടുള്ളത്.
ഇതില്‍ ഒരു അപേക്ഷകന് മൂന്നു ലക്ഷം രൂപയും 11 പേര്‍ക്ക് ഓരോ ലക്ഷം രൂപ വീതവും നാലു പേര്‍ക്ക് അമ്പതിനായിരം രൂപ വീതവുമാണ് അനുവദിച്ചിട്ടുള്ളത്. മറ്റുള്ളവര്‍ക്ക് അവരുടെ അപേക്ഷയുടെ ഗൗരവം പരിഗണിച്ചു അര്‍ഹമായ ധനസഹായവും അനുവദിച്ചിട്ടുണ്ട്. 2016 ഡിസംബര്‍ വരെയുള്ള അപേക്ഷകളില്‍ പരിശോധന പൂര്‍ത്തിയായവയിലാണ് ഇപ്പോള്‍ മുഖ്യമന്ത്രിയുടെ ഓഫിസ് സഹായം അനുവദിച്ചിട്ടുള്ളത്. സഹായം അനുവദിക്കപ്പെട്ടവരുടെ വിവരങ്ങള്‍ തന്റെ ഓഫിസിലും അതാതു വില്ലേജ് ഓഫിസുകളിലും താലൂക്കോഫിസിലും ലഭ്യമാണെന്ന് എം. നൗഷാദ് എം.എല്‍.എ അറിയിച്ചു.