ചങ്ങരംകുളം: ചൂണ്ടല്‍-കുറ്റിപ്പുറം സംസ്ഥാനപാതയില്‍ പാവിട്ടപ്പുറത്തും പന്താവൂരും ഹെടെക് ബസ് കാത്തിരുപ്പ് കേന്ദ്രങ്ങള്‍ വരുന്നു. പൊന്നാനി നിയോജക മണ്ഡലത്തില്‍ നിര്‍മിക്കുന്ന ഹെടെക് ബസ് കാത്തിരുപ്പ് കേന്ദ്രങ്ങളുടെ നിര്‍മാണ പ്രവൃത്തികളുടെ ഭാഗമായി സംസ്ഥാന പാതയിലെ ഈ രണ്ടിടങ്ങളിലാണ് പ്രവൃത്തികള്‍ നടക്കുന്നത്. സ്ഥലം എം.എല്‍.എയും സ്പീക്കറുമായ പി. ശ്രീരാമകൃഷ്ണന്റെ ആസ്തി വികസന ഫണ്ടില്‍ നിന്നും തുക വകയിരുത്തിയാണ് ആധുനിക ബസ് കാത്തിരിപ്പ് കേന്ദ്രങ്ങള്‍ നിര്‍മിക്കുന്നത്.
സൗരോര്‍ജത്തില്‍ പ്രവര്‍ത്തിക്കുന്ന ദീപവിതാനങ്ങളും എഫ്.എം റേഡിയോ, വൈഫൈ സംവിധാനങ്ങളും ബസ് കാത്തിരിപ്പ് കേന്ദ്രങ്ങളിലുണ്ടാവും. പൊന്നാനി നിയോജക മണ്ഡലത്തില്‍ 12 ഓളം കാത്തിരുപ്പ് കേന്ദ്രങ്ങളാണ് നിര്‍മിക്കാന്‍ ഉദ്ദേശിക്കുന്നത്. നിലവില്‍ ബസ് സ്റ്റോപ്പിന്റെ നിര്‍മാണവും ഭിത്തി കെട്ടലും പൂര്‍ത്തിയായിട്ടുണ്ട്. അടുത്തഘട്ടത്തില്‍ സൗരോര്‍ജ്ജ വൈദ്യുതി ഉപയോഗിച്ച് പ്രവര്‍ത്തിക്കുന്ന ലൈറ്റുകളും എഫ്.എം റേഡിയോയും സ്ഥാപിക്കും. ശേഷം വൈഫൈ സംവിധാനവും ഉണ്ടാകും.