പെരളശേരി: കഴിഞ്ഞ ദിവസം പുലര്‍ച്ചെയുണ്ടായ ചുഴലിക്കാറ്റിലും മഴയിലും എടക്കാട് മേഖലയില്‍ കനത്തനാശനഷ്ടം. നിരവധി വീടുകള്‍ തകര്‍ന്നു.
മരം വീണ് വൈദ്യുതി ലൈന്‍ അറ്റു. മേഖലയിലെ വിവിധ ഭാഗങ്ങളില്‍ വൈദ്യുതി വിതരണം താറുമാറായി. ആഡൂര്‍ കോങ്ങാട് പീടികയില്‍ പുറത്തെ വളപ്പില്‍ രോഹിണിയുടെ വീടിന്റെ അടുക്കളയുടെ ഭാഗം മരം വീണു തകര്‍ന്നു. മുണ്ടയോട് കക്കറയില്‍ ഗോവിന്ദന്റെ വീടിന്റെ ഓടുകള്‍ ശക്തമായ കാറ്റില്‍ തകര്‍ന്നു വീണു. ചാലയില്‍ കെ. മഹമൂദിന്റെ നിര്‍മാണത്തിലിരിക്കുന്ന വീടിന്റെ ഒരു ഭാഗം മരം വീണു തകര്‍ന്നു. വൈദ്യുതി കമ്പിയില്‍ മരം കടപുഴകി വീണതിനെ തുടര്‍ന്ന് വൈദ്യുത വിതരണം താറുമാറായി.കോട്ടം, മൂന്നുപെരിയ, ആഡൂര്‍, ചാല, ആര്‍വിമെട്ട, ചക്കരക്കല്‍ എന്നിവടങ്ങളിലും മരങ്ങള്‍ പൊട്ടുവീണു വൈദ്യുത ബന്ധമറ്റു. ഇന്നലെ വൈകുന്നേരം അഞ്ചുമണിയോടെ മിക്കയിടങ്ങളിലും വൈദ്യുത ബന്ധം പുന:സ്ഥാപിച്ചു
ഉരുവച്ചാല്‍: ചുഴലിക്കാറ്റും വേനല്‍മഴയും ഉരുവച്ചാല്‍ മേഖലയില്‍ വ്യാപകനാശം വിതച്ചു.ശനിയാഴ്ച രാത്രി വീശിയടിച്ച കനത്ത കാറ്റില്‍ മരം കടപുഴകി യും, തെങ്ങ് മുറിഞ്ഞു വീണുംവൈദ്യുത കമ്പികളറ്റു. പഴശ്ശി സുബൈര്‍ മന്‍സില്‍ എടി ആയിഷയുടെ വീട്ടുമുറ്റത്തെ തെങ്ങ് മുറിഞ്ഞ് വീണു. വീശിയടിച്ച കാറ്റില്‍ തെങ്ങ് വീട്ടിലേക്ക് വീഴാതെ പറമ്പിലേക്ക് വീണതിനാല്‍ ദുരന്തം ഒഴിവായി.റോഡരികിലെ മരം പൊട്ടിവീഴുന്ന സമയത്ത്
പള്ളിയില്‍ നിന്ന് തറാവീഹ് നിസ്‌കാരം കഴിഞ് മാലൂരില്‍ വീട്ടിലേക്ക് ബൈക്കില്‍ പോകവെ പഴശ്ശിയിലെ മദ്‌റസ അധ്യാപകന്‍ റസാക്ക് മൗലവി തല നാഴികക്ക് രക്ഷപ്പെട്ടു. ഉരുവച്ചാല്‍,പഴശ്ശി, എടപ്പഴശ്ശി, കരേറ്റ തുടങ്ങിയ സ്ഥലങ്ങളില്‍ വൈദ്യുതി ലൈനിന് മുകളില്‍ മരം പൊട്ടി വീണ് ലൈനുകള്‍ തകര്‍ന്നതിനെ തുടര്‍ന്ന് വൈദ്യുതി നിലച്ചു. ഇന്നലെ വൈകുന്നേരത്തോടെ കെ. എസ്. ഇ.ബി ജീവനക്കാര്‍ വൈദ്യുത വിതരണം പുന:സ്ഥാപിച്ചു. കയനി, മണക്കായി മേഖലകളില്‍ വാസു, മാമി എന്നിവരുടെ റബര്‍മരങ്ങളും കാറ്റില്‍ നിലംപൊത്തി.
കൂത്തുപറമ്പ്: ശനിയാഴ്ച രാത്രിയുണ്ടായ ശക്തമായ മഴയിലും മിന്നലിലും കോട്ടയം അങ്ങാടിയിലെ രണ്ടു വീടുകള്‍ക്ക് നാശനഷ്ടം. പിലാച്ചേരി ഷെരീഫ്, വാഴയില്‍ സഫിയ എന്നിവരുടെ വീടുകളിലെ മെയില്‍ സ്വിച്ച് ബോര്‍ഡടക്കം വയറിങ് സംവിധാനങ്ങള്‍ മുഴുവന്‍ നശിക്കുകയും കോണ്‍ക്രീറ്റ് വീടിന്റെ ചുമരുകളും, സണ്‍ സൈഡുകളും വിണ്ടു കീറുകയും തകരുകയും ചെയ്തു. പറമ്പിലുണ്ടായിരുന്ന തെങ്ങും മിന്നലേറ്റ് നശിച്ചു.കട്ടിലില്‍ നിന്നും തെറിച്ചുവീണ് പരുക്കേറ്റ സഫിയയ്ക്ക് ആശുപത്രിയില്‍ ചികിത്സ നല്‍കി.