പാലാ: പാറ ഖനനത്തിന് മതിയായ രേഖകളില്ലാതെ അനുമതി നല്‍കിയ സംഭവത്തില്‍ ഉദ്യോഗസ്ഥര്‍ക്കെതിരേ വകുപ്പുതല നടപടിയെടുക്കാന്‍ വിജിലന്‍സ് ഉത്തരവ്. ജിയോളജി ഡെപ്യൂട്ടി ഡയറക്ടര്‍ സി.കെ. ബൈജു, രാമപുരം വില്ലേജ് ഓഫിസര്‍ കെ.കെ. മധുസൂധന്‍,മുന്‍ അസിസ്റ്റന്റ് ജിയോളജിസ്റ്റ് കെ.കെ. വിജയ് എന്നിവര്‍ക്കെതിരെയാണ് വകുപ്പുതലനടപടികളെടുക്കുവാന്‍ തീരുമാനം. രാമപുരത്ത്  കിഴിതിരി, താന്നിപ്പാറയിലാണ് അനധികൃത ഖനനം നടന്നത്.
 8.9. ആര്‍ സ്ഥലത്തെ ജിയോളജി പെര്‍മിറ്റ് ഉപയോഗിച്ച്് രണ്ട് ഏക്കറോളം സ്ഥലം തെണ്ണൂറായിരം ഘനയടിക്കുമുകളില്‍ ഖനം ചെയ്തുവെന്നതും 500 ലോഡ് കല്ലുകൊണ്ടുപോകുവാനുള്ള പാസുപയോഗിച്ച് 18,000 ലോഡ് കല്ല് ഖനം ചെയ്തുകൊണ്ടുപോയെന്നും, ഖനനാനുമതിയില്ലാത്ത വ്യക്തിയുടെ സ്ഥലത്ത് ഖനം നടത്തിയെന്നും വിജിലന്‍സ് കണ്ടെത്തി. കൂടാതെ,പൊതുറോഡിന് 35 മീറ്റര്‍ അടുത്തുവരെ ഖനം നടത്തിയിട്ടും പരാതികള്‍ ലഭിച്ചിട്ടും നടപടി എടുത്തില്ലായെന്നതും ആവശ്യമായ രേഖകളില്ലാതെയാണ് ജിയോളജി പെര്‍മിറ്റ് നല്‍കിയതെന്നും അന്വേഷണത്തില്‍ കണ്ടെത്തിയിരുന്നു.
    ജോണി കളപ്പുരക്കല്‍ തുടങ്ങി ഏഴുപേര്‍ നല്‍കിയ പരാതിയിന്മേലാണ് വിജിലന്‍സ് അന്വേഷണം നടന്നത്. ജോബി മാത്യു,  മേരി ജോസഫ് കുന്നത്തേട്ട്, ചാക്കോച്ചന്‍ തടത്തില്‍ എന്നിവരുടെ സ്ഥലങ്ങളിലാണ് അനധികൃത ഖനം നടത്തിയത്.
എന്നാല്‍ ആറുകോടി രൂപയിലധികം തുകയ്ക്കുള്ള അനധികൃത ഖനം നടത്തിയ വ്യക്തിക്കെതിരേയും കൂട്ടുത്തരവാദിത്വമുള്ള റവന്യു, ജിയോളജി, പൊല്യൂഷന്‍ കണ്‍ട്രോള്‍ ബോര്‍ഡ് ഉദ്യോഗസ്ഥര്‍ക്കെതിരേയും നടപടികളെടുക്കാത്തതിനെതിരേ കോടതികളെ സമീപിക്കുമെന്ന് കിഴിതിരി പരിസ്ഥിതി സംരക്ഷണ സമിതി നേതാക്കളായ ജോണി കളപ്പുരയ്ക്കല്‍, കെ.ഇ. നാരായണന്‍ കിഴക്കേമുപ്പാത്ത്, രാഘവന്‍ നായര്‍ അമ്പാടിയില്‍, മുരളീധരന്‍ കാവുംപുറത്ത്, ജോസ് ആലയ്ക്കല്‍, കരുണാകരന്‍ കഴുന്നുകണ്ടത്തില്‍, അരുണ്‍ വണ്ടമ്മാക്കല്‍, ജോബി പുതിയകുന്നേല്‍ എന്നിവര്‍ പറഞ്ഞു.