മണ്ണാര്‍ക്കാട്: മണ്ണാര്‍ക്കാട് നഗരസഭയുടെ 2017-18 വര്‍ഷത്തേക്കുളള ബജറ്റ് വൈസ് ചെയര്‍മാന്‍ ടി.ആര്‍ സെബാസ്റ്റ്യന്‍ അവതരിപ്പിച്ചു. നഗരസഭാ ചെയര്‍പേഴ്‌സണ്‍ എം.കെ സുബൈദ അധ്യക്ഷയായി.
വര്‍ഷാരംഭത്തിലെ നീക്കിയിരിപ്പ് 1.27 കോടിയും, തനത് ഫണ്ട്, പ്ലാന്‍ ഫണ്ട്, മറ്റിനങ്ങളിലുമായി പ്രതീക്ഷിക്കുന്ന വരവ് 61.69 കോടിയുമടക്കം 62.97 കോടിയുടെ ബജറ്റാണ് അവതരിപ്പിച്ചത്.
61.78 കോടി ചെലവ് പ്രതീക്ഷിക്കുന്ന ബജറ്റില്‍ 1.18 കോടി നീക്കിയിരുപ്പുമുണ്ട്. സമ്പൂര്‍ണ ഭവന പദ്ധതിക്ക് പി.എം.എ.വൈ വിഹിതമായി പ്രതീക്ഷിക്കുന്ന 10 കോടി രൂപയും, നഗരസഭാ വിഹിതമായി 50 ലക്ഷവും ഉള്‍പ്പെടുത്തി എല്ലാവര്‍ക്കും ഭവനമെന്ന പദ്ധതിയാണ് നഗരസഭാ മുന്നോട്ട് വെക്കുന്ന ബജറ്റിലെ പ്രാധാന പദ്ധതി.
വിവിധ റോഡുകളുടെ ടാറിങ്, കോണ്‍ക്രീറ്റ് അനുബന്ധ പ്രവര്‍ത്തികള്‍ക്ക് 2.4 കോടിയും, സമഗ്ര വികസനം ലക്ഷ്യം വെച്ചുളള മാസ്റ്റര്‍ പ്ലാന്‍ തയ്യാറാക്കല്‍, വിവിധ ബസ് സ്റ്റോപുകളുടെ നവീകരണത്തിന് 25 ലക്ഷവും, കൃഷി - മൃഗ സംരക്ഷണത്തിന് 10 ലക്ഷം, വിദ്യാഭ്യാസം, കലാ കായിക യുവജന ക്ഷേമ പ്രവര്‍ത്തനങ്ങള്‍ക്ക് 40 ലക്ഷവും, ഡ്രൈനേജ് നവീകരണം, പ്ലാസ്റ്റിക് നിര്‍മാര്‍ജനം തുടങ്ങി ശുചിത്വ മേഖലക്ക് 10 ലക്ഷവും നീക്കി വെച്ചിട്ടുണ്ട്.
സമഗ്ര കുടിവെള്ള പദ്ധതിക്ക് 20ലക്ഷവും, ഡ്രീം പൊജക്റ്റുകള്‍ക്ക് അഞ്ചു കോടിയും വകയിരുത്തിയിട്ടുണ്ട്.