ഇരിട്ടി: പഞ്ചായത്തിനെ തരിശ് രഹിത ജൈവഗ്രാമമാക്കുന്നതുള്‍പ്പെടെയുള്ള സുപ്രധാന പ്രഖ്യാപനങ്ങളുമായി പായം പഞ്ചായത്ത് ബജറ്റ് അവതരിപ്പിച്ചു.കാര്‍ഷിക മേഖലയില്‍ സമഗ്ര വികസനം ലക്ഷ്യമാക്കി നെല്‍കൃഷി, ജൈവ പച്ചക്കറി, തെങ്ങ്, കവുങ്ങ് കുരുമുളക് മേഖലയിലും പശുവളര്‍ത്തല്‍, ആട് ഗ്രാമം, കോഴി മേഖലയിലുമായി 60 ലക്ഷം നീക്കി വെച്ചുകൊണ്ടുള്ള 21 കോടി 9669974 ലക്ഷം വരവും  20 കോടി 8612500 ലക്ഷം ചിലവും പ്രതീക്ഷിക്കുന്ന മിച്ച ബജറ്റ് പായം പഞ്ചായത്ത് വൈസ് പ്രസിഡന്റ് വി സാവിത്രി അവതരിപ്പിച്ചു. ഹരിത മാംഗല്യം കുടുംബശ്രീ ഇലകളിലൂടെ പദ്ധതി വിജയിപ്പിക്കുന്നതിന് 20 ഏക്കര്‍ സ്ഥലത്ത് ഞാലിപ്പൂവന്‍ വാഴത്തോട്ടം പദ്ധതി നടപ്പിലാക്കും. മാലിന്യ മുക്ത പ്രവര്‍ത്തനത്തിന്റെ ഭാഗമായി സംസ്‌കരണ യൂണിറ്റുകള്‍ സ്ഥാപിക്കുന്നതിനും മറ്റുമായി 50 ലക്ഷം നീക്കിവെച്ചു. വള്ളിത്തോട് മാര്‍ക്കറ്റില്‍ ബസ്സ്ന്റാന്റ് കം ഷോപ്പിങ് കോപ്ലക്‌സും കല്യാണ മണ്ഡപവും സ്ഥാപിക്കുന്നതിന്  ആവശ്യ
മായ സ്ഥലം വാങ്ങിക്കാന്‍ 40 ലക്ഷം, വള്ളിത്തോട് പി.എച്ച്.സി.യെ രോഗി സൗഹൃദ ഡിസ്പന്‍സറിയാക്കി ഒന്നര ഏക്കര്‍ സ്ഥലത്ത് നവീകരണം നടത്താന്‍ 20 ലക്ഷം, കോളിക്കടവിലെ ആയുര്‍വേദ ഡിസ്‌പെന്‍സറി ആശുപത്രിയായി ഉയര്‍ത്താന്‍ 10 ലക്ഷം, പഞ്ചായത്തിലെ എല്ലാ കുളങ്ങളും നീര്‍ച്ചാലുകളും സംരക്ഷിക്കാന്‍ 10 ലക്ഷം എന്നിങ്ങനെ തുക നീക്കിവച്ചു. മൂന്നു വര്‍ഷത്തിനുള്ളില്‍ എല്ലാ വീടുകളിലും കിണര്‍ റീ ചാര്‍ജ്ജ് ചെയ്യും. നടപ്പു വര്‍ഷം തന്നെ പഞ്ചായത്തിനെ ഭിന്നശേഷി സൗഹൃദ പഞ്ചായത്ത്, വയോജന സൗഹൃദ പഞ്ചായത്ത്, ബാല സൗഹൃദ പഞ്ചായത്ത് ആയി പ്രഖ്യാപിക്കുവാന്‍ പദ്ധതികള്‍ ആസൂത്രണം ചെയ്തു. വിദ്യാര്‍ഥികള്‍ക്കും കുടുംബശ്രീ അംഗങ്ങള്‍ക്കും യോഗ, കളരി, കരാട്ടെ ക്ലാസുകള്‍ സംഘടിപ്പിക്കുവാന്‍ ആറു ലക്ഷവും ഫുട്‌ബോള്‍, വോളിബോള്‍ കോച്ചിങ്ങിന് ഒരു ലക്ഷവും നീക്കിവച്ചു. പഞ്ചായത്ത് കെട്ടിടത്തില്‍ ഓഡിറ്റോറിയം നിര്‍മിക്കാന്‍ 10 ലക്ഷം നീക്കിവച്ചു. പഞ്ചായത്ത് പ്രസിഡന്റ് എന്‍ അശോകന്‍ അധ്യക്ഷനായി. സെക്രട്ടറി ബാബു ജോസഫ്, വി.കെ പ്രേമരാജന്‍, ടോം മാത്യു, അനിത ജാനിഖാന്‍, ബാലകൃഷ്ണന്‍, ഇബ്രാഹിംകുട്ടി വള്ളിത്തോട്, പവിത്രന്‍ കരിപ്പായി, ജമീല നാസര്‍, കെ മീന, കെ.കെ വിമല സംസാരിച്ചു.