തൊടുപുഴ: നിപാ വൈറസ് സംസ്ഥാനത്ത് ഭീതി പരത്തുമ്പോഴും തൊടുപുഴ ജില്ലാ ആശുപത്രി അധികൃതര്‍ക്കു കുലുക്കമില്ല.
ജില്ലാ ആശുപത്രിയിലെ ആവശ്യങ്ങള്‍ക്കായി ജലമെടുക്കാന്‍ ആശ്രയിക്കുന്ന കിണറ്റില്‍ മലിന ജലം ഒഴുകിയെത്തുന്നത് തടയാതെ അധികൃതര്‍ നിസ്സംഗത തുടരുകയാണ്. കിണറിന്റെ വശത്തുകൂടിയാണ് മാലിന്യവാഹിനിയായ ഓട കടന്നുപോവുന്നത്. ഈ ഓടയില്‍ നിന്നാണ് ജലം കിണറ്റിലേക്ക് എത്തുന്നത്. കിണറ്റിലേക്ക് മലിന ജലം ഒഴുകി എത്തുന്നത് തടയാന്‍ നടപടി സ്വീകരിക്കണമെന്ന് ഇവിടം സന്ദര്‍ശിച്ച തൊടുപുഴ തഹസില്‍ദാരും മലിനീകരണ നിയന്ത്രണ ബോര്‍ഡ് ഓഫിസറും മുനിസിപ്പല്‍ വൈസ് ചെയര്‍മാനും അടങ്ങുന്ന സംഘം ആശുപത്രി അധികൃതരോട് നിര്‍ദേശിച്ചിരുന്നതാണ്. ഓട കോണ്‍ക്രീറ്റ് ഉപയോഗിച്ച് കെട്ടി മലിന ജലം കിണറ്റിലെത്തുന്നത് ഒഴിവാക്കാനായി ഫണ്ടും വകയിരുത്തിയിരുന്നു. എന്നാല്‍ ഒന്നും നടന്നില്ല. കിണറിന്റെ പിന്‍വശത്തുള്ള ഹൗസിങ് കോളനിയില്‍ നിന്നാണ് ഓടയിലൂടെ ജലം കിണറ്റിലെത്തുന്നത്. കോണ്‍ട്രാക്റ്റര്‍ ഓട കോണ്‍ക്രീറ്റ് ചെയ്തുവരവെ കിണറിനു പിന്‍വശത്ത് താമസിക്കുന്ന സ്വകാര്യ വ്യക്തി എതിര്‍പ്പുമായി രംഗത്തെത്തി. തുടര്‍ന്ന് കോണ്‍ക്രീറ്റിങ് നിന്നുപോയി.
എന്നാല്‍, ബന്ധപ്പെട്ട അധികൃതര്‍ പ്രതിസന്ധി പരിഹരിക്കാന്‍ യാതൊരു നീക്കവും നടത്തിയില്ല. മേഖലയില്‍ പകര്‍ച്ച വ്യാധികള്‍ അടക്കം പടരുമ്പോഴും അധികൃതര്‍ ഇതൊന്നും അറിഞ്ഞ മട്ടില്ല. ഇതുസംബന്ധിച്ച് തൊടുപുഴ താലൂക്ക് വികസന സമിതി യോഗത്തില്‍ അംഗങ്ങള്‍ നിരവധി തവണ പരാതി ഉന്നയിച്ചതുമാണ്. എന്നിട്ടും മലിന ജലം തന്നെ കുടിക്കാനാണ് ആശുപത്രിയില്‍ കഴിയുന്ന രോഗികളുടെയും കൂട്ടിരിപ്പുകാരുടെയും വിധി.
ഈ കിണറ്റിലെ മലിനജലം ജില്ലാ ആശുപത്രിയിലെ രോഗികളെ കുടിപ്പിക്കാതിരിക്കാനുള്ള എല്ലാ നടപടികളും ജില്ലാ കലക്ടറും തൊടുപുഴ തഹസില്‍ദാരും സ്വീകരിക്കണമെന്ന ആവശ്യം ശക്തമാണ്. കിണറിനു പിന്‍വശത്തു താമസിക്കുന്ന സ്വകാര്യ വ്യക്തിയുമായി ബന്ധപ്പെട്ട് പ്രശ്‌നങ്ങള്‍ പരിഹരിക്കേണ്ടതിനു പകരം കോണ്‍ക്രീറ്റിങ് നിര്‍ത്തിവയ്ക്കുന്നതു കൂട്ടുനിന്ന ആശുപത്രി അധികൃതര്‍ക്കെതിരേയും പ്രതിഷേധം ശക്തമാണ്.
മഴക്കാലം അടുത്തെത്തിയതിനാല്‍ ആശുപത്രിയിലും പരിസരമേഖലയിലും പകര്‍ച്ച വ്യാധി ഭീഷണിയുണ്ട്. അധികൃതര്‍ അടിയന്തരമായി ഇടപെട്ടില്ലെങ്കില്‍ ശക്തമായ സമര പരിപാടികളുമായി രംഗത്തു വരാന്‍ ഒരുങ്ങുകയാണ് നാട്ടുകാര്‍.

.